SA pagpalapad sa COVID-19 “Alert Level System” gawas sa National Capital Region (NCR), sugod Oktubre 20, 2021 apil na ang Davao del Norte (sa Rehiyon 11), Rehiyon 7 ug 4A nga magpatuman ug dili na ang naandan nga MGCQ, GCQ, GCQ with HR, MECQ ug ECQ nga klasipikasyon ang gamiton.

Labot sa “kalahian” ang COVID-19 Community Quarantine classification nakatutok sa gilapdon sa lugar/sectoral nga pagdili samtang ang Alert Level naghatag gibug-aton sa lugar diin daghan ug nagtaas ang kaso sa COVID ingon man ang kapasidad sa mga tig-atiman ug ang katre sa mga hospital nga magamit. Ang pagpatuman sa “granular lockdowns” ilawom sab sa Alert Level System.

Sa kasamtangan ang tibuok Davao del Norte nailawom sa General Community Quarantine (GCQ) with heightened restrictions apan base sa proklamasyon sa National Inter-Agency Task Force ipailawom kini sa Alert Level 3. Tungod niini mipagawas og Executive Order 39 Series of 2021 si Gobernador Edwin “Kuya Gob” Jubahib penetsahan Oktubre 19, 2021.

Ang mga ‘guidelines’ ilawom sa Alert Level 3 nga naunod sa EO 39 S2021 naglakip sa:

- Gituogtan ang pagbiyahe diha sa Intrazonal (parehas ug Alert Level nga lugar) ug Interzonal (dili parehas og alert level) apan kadtong ubos sa 18 anyos ang edad, kadtong mga “vulnerable” nga mga tawo tugotan lamang kung ang tuyo aron makakuha sa mga essential goods. Apil na sab niini ang pagtrabaho diha sa gitugotan nga mga factory, kompaniya ug mga opisina;

- Ang pag-exercise diha sa gawas gitugot bisan dunay co-morbidities, nabakunahan man o wala;

- Hinuon, ang mga establisamento ug mga kalihokan nga dunay taas nga risgo nga mapasa ang virus ilawom sa 3Cs (Closed, Crowded ug Close contact) wala gitugotan sama sa:

a) Mag-atubangay nga klase gawas sa gitugotan sa IATF ug sa opisina sa Presidente sa nasod;

b) Contact sports;

c) Mga peryahan ug mga kalingawan sa kabataan sama sa playgrounds, playroom ug kiddie rides;

d) Mga karaoke bars, clubs, concert halls, ug teatro;

e) Mga casinos, sabongan, loteriya ug mga pasugalan gawas na lang kung dunay pagtugot sa IATF ug sa Presidente; ug,

f) Ang pagtapokay diha sa balay nga dili kauban sa pagpuyo.

- Ang mosunod mga establisamento ug mga kalihokan gitugotan hangtod lang sa 30% diha sa sulod ug 50% diha sa gawas basta pulos nabakunahan ug ang mga empleyado sa maong establisamento bakunado na sab tanan, sama sa:

a) Lugar himoan og miting, kumperensya;

b) Gitugotan nga lugar para sa party, kasal, anibersaryo , debut, birthday ug mga family reunions;

c) Mga tourist attractions nga lugar, librarya, archive, museums, galleries, parks, plazas, public gardens ug uban pa;

d) Mga internet cafes, billiard halls, amusement arcades, bowling alleys, swimming pools ug puparehas nga mga lugar;

e) Mga sinehan;

f) Mga religious gatherings, lamay, basta dili COVID-19 ang hinungdan;

g) Mga entrance/qualifying examinations nga gipahigayon sa ahensya sa gobyerno basta gitugotan sa IATF;

h) Mga restaurants ug ubang establisamento nga naghimo og dine-in nga mga serbisyo.

Ang pagdeklarar sa granular lockdown anaa sa kagahom sa LGU.

Ang masinupakon mag-atubang sa silot sumala sa gimbut-an sa balaod ug epektibo ang EO 39 hangtod nga kini i-revoked o ilisdan.

[Ang katibuk-an sa EO 39 Series of 2021 mabasa sa One DavNor Network facebook page]

**********************///