SUGDAN na sa tibuok Davao del Norte ang pagbakuna sa mga menor-de-edad karong Myerkoles, Nobyembre 3, 2021 kasabay sa tibuok nasod nga pangbakuna sa 12-17 anyos nga kabataaan.

Kini ang gibutyag ni Provincial Vaccination Operation Center Head Dr. Eleanor Salva sa interbyu Oktubre 28.

“Kaning pediatric nga bakunahan 12-17 years old, nationwide gyod ani is November 3. . Sa atong probinsya sa Davao Norte sabay-sabay ni. Sa DRMC nga pinakadako nato nga hospital sa November 3 together sa atong ubang LGUs. Dire sa PHO, November 4 ang atoa nga buhaton,” pagbutyag ni Dr. Salva.

Apil nga mabakunahan ang ginikanan o’ guardian nga mokuyog sa menor-de-edad kung wala pa kini nabakunahan.

“Sa atoang katawhan sa DavNor, naa ta’y bakuna para sa mga bata nga nag-edad 12 hangtod 17 anyos. Unahon nato tong naay mga comorbid. Kung ubanan man sila og mga guardian, mga ginikanan nga wala pod nabakunahan, apilon napod namo’g bakuna,” dugang pagbutyag sa doktor.

Alang sa dunay comorbidity nga menor-de-edad, una moadto sa vaccination center angay seguroon nga madala ang medical certificate gikan sa pediatrician. Dalhon sab ang birth certificate sa bata ingon man magdala og dokumento sama sa ID pagmatuod nga sila ang ginikanan o guardian sa bata.

“Una sila moadto sa lugar nga vaccination center naay mga requirements nga kinahanglan. Naay medical certificate gikan sa ilang pediatrician, naa pod sila’y mga dokumento ang ginikanan or guardian nga dalhon nagpamatuod nga kana nga bata ilahang anak. Magdala pod sila’g mga documents example ID sa ginikanan nagpamatuod nga kadtong naka-reflect nga pangalan sa birth certificate sa bata ilaha gayod tong anak. So dalhon gyod to nila ilahang mga document kay sa registration area ipakita nila to bago bakunahan ang bata. Ug naa pod ni consent sa ginikan or guardian. So kung dili magpirma ang ginikanan or guardian, dili pod namo bakunahan ang ilang anak. Naa ta’y ginaigon nga consent nga ihatag sa ilaha,” matod sa DavNor Vaccination Operation Center head.

Sumala sa Department of Health (DOH) ang bakuna nga hinimo sa Pfizer ug Moderna ang ibakuna sa mga menor-de-edad.

Tumong gayod sa administrasyon ni Gobernador Edwin “Kuya Gob” Jubahib nga makab-ot ang herd immunity (70% sa populasyon nga bakunado) aron sab molihok pagbalik ang ekonomiya nga magkinabuhi ilawom sa “new normal.”

Gawas sa regular nga pagpangbakuna, gisugdan na sab sa Provincial Health Office (PHO) ang mobile vaccination og unahon ang mga barangays sa Talaingod, Asuncion, New Corella ug Braulio E. Dujali.

Niining semanaha 229 ka indibiduwal ang nakadawat og first dose didto sa Cabay-angan, Braulio E. Dujali ug ipadayon kini sa PHO matag semana ingong tabang sa mga LGUs aron gyod daling maabot ang herd immunity.