MIABOT na 7503 ka indibiduwal ang nakadawat tabang gikan sa Tulong Panghanapbuhay sa Ating Disadvantaged/Displaced Workers kun TUPAD program sa Department of Labor and Employment pinaagi sa KAwsa sa AGrikulturA ug PAnginabuhian sa barangaY (KAAGAPAY), ang food-sufficiency program sa administrasyon ni Gobernador Edwin “Kuya Gob” Jubahib.
Gumikan sa COVID-19 pandemic niadtong sayong bahin sa 2020, gilusad ni Kuya Gob ang KAAGAPAY nga nakig-alayon sa ubang ahensya sa kagamhanan aron matabangan ang katawhan nga masagubang ang kanihit sa pagkaon ilabina ang marginalized sector nga naglisod sa ekonomiya gumikan sa pandemya.
Pinaagi sa DavNor Provincial Agriculture Office (PAGRO), ang KAAGAPAY nag-awhag ug nagtudlo sa katawhan nga magtanom og gulay ingon man naghatag libre sa mga semilya nga itanom. Ang ilang produkto adtoon ug paliton pagbalik sa probinsya aron dili na maghago ug mogastos ang mag-uuma sa pagbaligya.
Didto sa Barangay Magwawa, Sto. Tomas, ang pamilya ni Joseph Rizon nakapalit og carabao sa halin sa kalabasa samtang ang pamilya ni Fernandito Polloso nakapalit sab chainsaw ug motorsiklo gumikan sa halin sa kalabasa ug ubang gulay niining tuiga lang.
Sa mga KAAGAPAY benepisyaryo (gikan sa ‘marginalized sector’) nga magpadagko’g manok, sila giporma ingong People’s Organization (PO), libreng gihatagan og mga piso nga ilang padakoon nga paliton ra sab pagbalik sa probinsya. Aron “mabayaran” ang ilang kahago ug gastos paghimo’g kulongan, mitabang ang TUPAD program pinaagi’g pagbayad tig P3960 ang matag indibiduwal sulod sa napulo ka adlaw. [Mga benepisyaryo nga may gidawat hinabang sa gobyerno sama sa 4Ps dili apil pagbayad].
Nagkadako ang interes nga miabot na 909 ka aplikasyon aron mahimong POs ang nadawat sa DavNor Cooperative Investment Development Division (CIDD) apan namatikdan nga 688 niini daghang “kulang” hinungdan malangan sab nga ilang madawat ang tabang gikan sa TUPAD-KAAGAPAY.
Sanglit hapit na matapos ang tuig ug himoon ang “closing of books” giawhag sa DavNor CIDD nga asikasohon sa mga opisyales og membro uban sa tabang sa KAAGAPAY staff aron mapaabot ang gikinahanglan nila nga tabang.
Alang sa tuig 2022, migahin og P45 milyones ang administrasyon ni Kuya Gob aron pondohan ang KAAGAPAY food-sufficiency program sa pagtabang sa mga marginalized sector ilabina nga wala pa nawala ang COVID-19 pandemya.
*****************///
