Bisan sa kusog nga ulan, wala nabalda ang pagpang-apod-apod sa mga motorsiklo karong adlawa, Disyembre 14, alang sa tanang barangay sa Probinsya sa Davao del Norte, dinhi sa Capitol Compound, Mankilam, Siyudad sa Tagum.

235 ka motorsiklo ang pagadawaton sa mga Punong barangay ug laing 26 ka buok ang gigahin alang sa mga Liaison Officers sa opisina sa gobernador, diin 160 niini ang gitunol karong adlawa alang sa unang batch ug duna pay laing 101 ka buok sa 2nd batch ang nagpaabot iiskedyul kung kanus-a ipang-apod-apod.

Duha ang ilang kapilian tali sa Honda XRM 125 ug XR 150, depende kung asa sila komportable sukwahi sa unang taho nga ang XRM alang lamang sa mga babae ug ang XR sa mga lalaking punong barangay. Gawas sa motor, nakadawat usab sila’g jacket ug helmet aron sa dugang proteksyon samtang nagbyahe.

Sumala ni Felipe Cortes, Punong Barangay sa Semong, usa sa mga hilit nga dapit sa lungsod sa Kapalong, nga dako iyang pasalamat gumikan kay dugay na nilang pangandoy ang maong sakyanan.

“Ilabina sa akong barangay nga anaa sa remote area sa Kapalong, dili masulod og 4 wheels ang mga area nako nga dunay mga rescuehonon, dunay mga inspectionon, adtoon nga mga proyekto. So mao ni ang dako kaayo’g tabang sa amoa kining motor karon kay pwede na mi makaadto sa mga area namo nga medyo layo sa sentro,” asoy ni Kapitan Cortes nga nagbutyag usab sa kalisud sa ilang dalan nga gihinay-hinay na’g pasemento sa probinsya.

Bisan usa ka babaye, gikalipay ni Brgy. Captain Girly Gungob sa Balet, Babak District, Samal, nga naapil gyud sila nga nakadawat.

“Dako namong pasalamat kay Gob Edwin Jubahib tungod kay kini nga motorcycle gamit kaayo. Ilabina ako as a barangay captain tuod man usa ka babae apan nasanay ako nga magmotor ilabina na nga duna tay ginaprocess nga mga papers, dokumento sa barangay. Pag-adto sa cityhall gamit gyud kaayo ni, dali ra makatravel sa pag-asikaso niini,” pagsubay sa kapitana nga kada adlaw nagabyahe aron mahikay ang mga paperworks.

Kamatikdan usab ang naka-display nga 148 ka mga surplus bikes nga matud ni Executive Assistant III Newell de Ramos nga ipang-apod-apod usab pinaagi'g raffle draw sa mga barangay health workers, barangay nutrition scholars, barangay sanitary inspectors ug blood coordinators sa matag LGU atol sa pagdistribute sa ilang tinuig nga cash incentives sugod sunod semana.

Kahinumdoman nga gihatud ang mga motorsiklo sa LYR Marketing kaniadto pang bulan sa Setyembre niining tuiga apan wala gilayon nahatag sanglit gihulat pa ang mga papeles gikan sa LTO ug GSIS. Human sa hapit tulo ka bulan, hitsas na ang tanang papeles sama sa OR ug CR sa motor ug natuman ra gyud ang gisaad ni Gobernador Edwin “Kuya Gob” Jubahib alang sa mga barangay.

“Mao kini ang atong gi-promise sa atong mga barangay captains para nga mas makatrabaho sila og ensakto sa ilang barangay kay nakita nato nga gikinahanglan gayud ang mobility… So karon, wala nay rason nga dili mabisita ang kapurokan para sa paghatud og tinuod nga serbisyo sa katawhan ug mahibal-an nato unsay mga problema sa mga purok sa tagsa-tagsa ka barangay para nga atong ma-address dayon… Malipayon kaayo ta labi pa nga ato kining nahatag panahon sa pasko. Dako kaayo akong kalipay ug nakita sab nako nga sobra kamalipayon ang atong mga barangay captains nga midawat niini… And advance merry Christmas and happy new year sa tanang katawhan sa probinsya sa Davao del Norte. Magmalipayon ta sa atong pag-celebrate, sa atong pagsugat sa Pasko ug sa bag-ong tuig,” saysay sa gobernador nga naningkamot nga matubag ang mga panginahanglanan sa barangay sa iyang administrasyon.