Namintinar sa lalawigan sa Davao del Norte ang dungog isip 2nd Overall Most Competitive Province sa tibuok Pilipinas, tungud sa taas nga grado niini sa dagan sa ekonomiya, maayong pagdumala, imprastraktura ug kalig-on taliwala sa krisis.
Atul sa gipahigayon nga virtual 9th Regional Competitiveness Summit ganinang buntag, nasakmit sa Davao del Norte sa ika-duhang higayon ang ika-duhang pinakataas nga score sa ‘competitiveness ranking’ sa 81 ka mga probinsiya sa nasud.
Unang nadawat sa probinsiya ang maong ranking sa milabay nga tuig 2020. Tungud niini, nagpabilin sab kini nga pinaka-competitive nga probinsya sa Davao Region ug sa tibuok Mindanao.
Ang maong pasidungog nagpakita sa kalig-on sa liderato ni Governor Edwin “Kuya Gob” I. Jubahib, kinsa miplastar sa mahinungdanon nga mga reporma ug programa aron makab-ot sa probinsiya ang tinuod nga kabag-ohan ug tinuoray nga inklusibong kalamboan.
Sa iyang maayong panggobyerno, unang nadawat sa Davao del Norte ang Most Business-Friendly (MBF) Province Award sa tuig 2019, samtang nahimo kining Top 10 MBF Finalist sa 2020 ug 2021. Nakab-ot sab sa Davao del Norte ang pinaka-ubos nga poverty rate, kon insidente sa kakabus, sa tuig 2020 sa tibuok Mindanao, nga anaa sa 10.3 % incidence rate.
Bisan sa pag-abot sa pandemya, gihimo ni Kuya Gob ang krisis isip usa ka dakong oportunidad aron pakusgan ang paghatud sa serbisyo, imprastraktura, pagdaog sa kalinaw ug pagkab-ot sa maluntarong kalamboan para sa tanan.
Iyang gilusad ang DavNor COVID-19 Information Management System (DCIMS) aron mapugngan ang pagkuyanap sa sakit, diin nahimo kining mananaog isip Best in Government Covid-19 Pandemic Response, atul sa Digital Governance Awards 2021.
Giimplimentar sab ni Kuya Gob ang DavNor KAAGAPAY (KAwsa sa AGrikulturA alang PAnginabuhian sa barangaY) Program aron dunay saktong pagkaon, matagaa’g panginabuhian ang katawhan ug mapanalipdan ang kinaiyahan panahon sa pandemya.
Apil sab sa iyang mga programa ang Zero-Billing program sa mga provincial hospitals, rice-buying program, bag-ong kadalanan sa lagyong komunidad sa IPs, pagpadako ug pagpalalum sa mga canal ug suba aron masulbad ang pagbaha, pagtukod sa kapin 500 ka mga balay sa IPs, ending local communist armed conflict (ELCAC) ug daghan pang uban.
Nakuha sab sa Tagum City ang 3rd Overall Most Competitive Component City, samtang ika-walo ang Panabo City sa “Resiliency under the Component City Category.”
Ang ‘Cities and Municipalities Competitive Index’ maoy usa ka tinuig nga paghatag og grado sa mga dakbayan ug lungsod sa National Competitiveness Council (NCC), pinaagi sa Regional Competitiveness Committees (RCCs), diin nakabase kini sa sumada sa ilang score sa “Economic Dynamism, Government Efficiency, Infrastructure, and Resiliency”.
