GIPASIDUNGGAN sa probinsyal nga panggamhanan ni Gobernador Edwin “Kuya Gob” Jubahib pinaagi sa KAwsa sa AGrikulturA ug PAnginabuhian sa barangaY (KAAGAPAY) ang paningkamot sa tanang personahe ilabina ang nag-unang napulo ka mga kawani nga nagtabang sa mga benepisyaryo nga modaghan ang ilang abot sa pagtanom og gulay.

Ang KAAGAPAY maoy food-sufficiency program ni Kuya Gob nga gilusad Hunyo 2020 aron mapugngan ang kanihit sa pagkaon gumikan sa COVID-19 pandemya.

Ang gulay produksyon usa lang sa tulo ka dagkong paningkamot sa kawsa gawas sa pagtanom sa kahoy ug ang pagbuhi og manok (free range).

Sa evaluation nga gipahigayon Disyembre 10, ang Hulyo--Disyembre 9, 2021 rekord sa Provincial Agriculturists Office [PAGRO] nagpakita nga ang mga tigtanom og gulay sa Barangays Semong ug Florida, Kapalong ilawom ni KAAGAPAY staff Gerhard Barcenas nakapatungha’g 172,464 kilos sa klase-klaseng gulay. Ang mga mag-gugulay sa Barangay Magwawa, Sto. Tomas ilawom ni KAAGAPAY staff Joel Camagong dunay narekord 18,663 kilos nga giilang ikaduhang daghan na-harvest.

Gawas ni Barcenas ug Camagong, ang kumpletong top 10 naglakip nila Junivic Lura ug Edgardo Manigo (nagpareha nga ika-3), ika-4 Enrique Alimbon, ika-5 Carmelita Apaz, ika-6 Ray Narita, ika-7 Rechelle Bautista, ika-8 Mellie Lanos, ika-9 Dave Jadulos ug ika-10 Lilibeth Ugaril.

Giila sab sa KAAGAPAY ang top 5 LGUs sa pagpadaghan sa gulay bisan diha lang sa tugkaran nga naglangkob sa Kapalong, Tagum City, Panabo City, Sto. Tomas ug Asuncion.

Atol sa evaluation, ang top 10 pulos nakadawat og tig P500 cash og niadto lang Disyembre 20 ilang nadawat ang tig-isa ka sakong bugas ug Gantimpala Award pinaagi sa Provincial Human Resource Office [PHRMO] ingong pag-ila sa ilang kontribusyon sa KAAGAPAY programa ni Kuya Gob sa pagtabang sa katawhan.

*****************///

 

 

 

 

 

DavNor News