MIABOT na sa 74% sa populasyon ang nahatagan og first dose sa tibuok Davao del Norte samtang halos 49% ang fully-vaccinated hangtod Disyembre 21, 2021.

Gipaningkamotan gayod sa administrasyon ni Gobernador Edwin “Kuya Gob” Jubahib pinaagi sa Provincial Health Office (PHO) nga sa pagtapos sa 2021 maabot ang “herd immunity” kun 70% sa 1,063,436 nga nagpasabot nga 744,405 ka tawo ang angayan makadawat sa kumpletong bakuna.

Sa record sa PHO, ang Tagum City ang dunay kinatas-ang 80.9% first dose bakunado nga gisundan sa lungsod sa Braulio E. Dujali nga 79.4%. Ang lungsod sa Talaingod ang pinakaubos sa 29.8% nga nag-inusarang lungsod sa 11 ka LGUs nga wala makalampas sa 50% first dose sa iyang populasyon nga angay bakunahan.

Sa mga LGUs nga nakahimo second dose sa pangbakuna, ang Sto. Tomas ang pinakataas 61.4% “fully-vaccinated” sa iyang populasyon uban sa Tagum City, Panabo City, Island Garden City of Samal (IGACOS) ug BE Dujali nga pulos lampas 50%.

Sa pagdaghan sa nabakunahan miubos pag-ayo ang narekord nga kaso sa COVID-19 nga ang Disyembre 21 report sa DavNor COVID-19 Task Force nagpakita og isa (1) ka kaso samtang 4 ang nakarekober.

Sa tibuok Rehiyon XI, nanguna ang DavNor sa lima ka probinsya sa paghatag og bakuna gawas sa Syudad sa Davao.

Hinuon dili buot mag-relax ang PHO ug mga Municipal Health Offices nga sa pagpanguna ni Dr. Alfredo Lacerona kauban ang tibuok DavNor Vaccination Teams ilang gisubli-subli ang panawagan nga magpabakuna na kadtong wala pa aron malayo nga matakdan sa COVID-19 ilabina nga nagsingabot ang daghang holidays nga dili malikayan ang tapok-tapok.

Gawas sa pagpabakuna, padayon sab nga giawhag nga sundon gihapon ang health protocols sa pagsuot sa face mask, kanunay’ng paghugas sa kamot ingon man ang physical distancing.

***************///

 

 

DavNor News

nainggo