Ginasalamin sa Oplan TABANG 2 Resbakuna Plus (OT2) ang esensiya sa pagdumala ni Governor Edwin "Kuya Gov" Jubahib, diin iyang gipaduol ang Probinsyal nga Panggamhanan sa katawhan, pinaagi sa paghatud sa mga serbisyo mismo diha sa ilang tugkaran.
"Ang gobyerno mismo maoy moadto sa inyong tugkaran aron sa paghatag og serbisyo," sulti sa gobernador," atul sa katapusang hugna sa pagtuyok sa Oplan TABANG serbisyo caravan sa Island Garden City of Samal (IGCS).
Wala nakapugong ang mga pag-ulan sa pagdagsa sa mga residente sa Babak District, aron pahimuslan ang pagbunok sa daghang mga serbisyo karong adlaw sa Martes, Marso 1, 2022, diin kapin libo ka mga residente sa Babak ang nakabenipisyo sa dul-an 40 ka mga serbisyo nga dala sa Kapitolyo.
Gibitbit gihapon ni Kuya Gov ang mga nagkalainlaing departamento sa Kapitolyo aron paghatud sa mga libreng serbisyo, sama sa medical consultation, dental, tambal, minor surgery apil ang tuli, social, legal, agriculture, veterinary, gupit ug uban pa.
Gidugangan pa kini sa programang pagbakuna kontra Covid-19 sa gipakusog nga kampanya sa gobyerno batok pandemya.
Kauban ni Kuya Gov sila Board Member Dindo Parangan, Provincial Administrator Engr. Josie Jean Rabanoz ug mga department heads sa Kapitolyo.
Gilusad balik ni Kuya Gov ang OT2 niadtong milabay nga Pebrero 22, 2022 sa Kaputian District sugod sa Talicud Island, nga gisundan sunod adlaw sa sentro sa Kaputian. Gisumpayan dayon kini sa OT2 caravan sa Peñaplata, Samal District niadtong Pebrero 24, 2022.
Kahinumduman nga gisugdan ni Kuya Gov ang Oplan TABANG (Tapok sa Barangay Alang sa Nanginahanglan ug Galisod) sa iyang paglingkod niadtong tuig 2019, aron dad-on ang serbisyo sa gobyerno ngadto sa mga geographically-isolated and disadvantaged areas (GIDAs), kon mga lugar nga lagyo ug pobre.
Apan, naundang kini sa pag-abot sa pandemya sa tuig 2020, tungod sa pagpatuman sa mga health protocols.
“Ang Oplan TABANG mao ni atong program sukad sa pagsugod nato. Naundang tungod sa pandemic pero karon kay naa na ta sa Level 2, so padayon na nato," sulti ni Kuya Gov.
Sulti ni Richie Ann Barroga, 24, taga-Barangay Tambo, Babak District nga dako'g epekto ang maong programa sa pagdumala sa gobernador.
"Dako kini og impact. Usa ni sa daghang mga achievement ni Kuya Gov nga naghatag dako'g kaayuhan sa katawhan. Wala jud mi maalkansi sa among pagbiyahe pag-anhi diri," sulti niya human magpa-check-up sa iyang anak nga si James Kyle, sais anyos ang pangidaron.
Gikan Samal, sunod nga adtoan ugma sa OT2 caravan ang Tagum City, diin ipahigayon kini sa Tagum City Trade School sa Apokon aron serbisyohan ang 11 ka mga barangay sa dakbayan.
Target sa Kapitolyo nga humanon og tuyok sa OT-2 ang tanang local government units (LGUs) sa probinsiya hangtud Marso 24, 2022.
