DILI lang karsada, pabalay, tubig, kuryente ang gitunol nga serbisyo sa administrasyon ni Gobernador Edwin “Kuya Gov” Jubahib sukad sa iyang paglingkod niadtong Hulyo 1, 2019 ngadto sa mga Indigenous People (IPs).

Atol sa Community Surrender and Declaration of Pagsalikway Against the CPP-NPA-NDF by the Surrenderees, matod sa Gobernador nga iyahang seguroon nga mahatod gayod ang dugang serbisyo ilabina ang edukasyon ug agrikultura alang sa dumalayon nga kalamboan sa mga IPs.

Ang paghatag ni Gobernador Jubahib og linain nga atensyon sa Talaingod IPs usahay gisabot sa uban nga dunay pabor-pabor apan giklaro ni Kuya Gov nga gumikan kini kay ang mga IPs “nakalimtan” sa daghang katuigan.

“Sayod naman mo gikan 2019 pagka-governor nako hangtod karon ang akong kasingkasing mao ra gyod ang pagtabang sa inyohang tanang problema dinhi sa Talaingod. . mao na’y atong gipaningkamotan pagsulbad. Sayod pod ko sa inyong tanang kasakit sukad kaniadto sa mga milabay’ng panggobyerno nga wala mo mahatagi og ensaktong pagtagad. Nakita nako unsa kalisod ang inyong sitwasyon nga maoy hinungdan nganong tua mo sa pikas,” matod ni Kuya Gob atubangan sa halos 300 ka mga surremderee IPs nga kanhi fighters ug supporters sa kalihokang NPA.

Sa estadistika sa Philippine Army halos pito sa napulo nga recruit sa NPA maoy mga IPs. Ang kakulang sa edukasyon ug ang kalisod mao ang giingon nga dakong hinungdan nganong “nailad” sila.

“Giplano na nako nga ang tanang sitios dunay elementary school, maghimo pod ta’g cluster nga magkaroon og highschool para di na magkalayo-layo ang inyong mga anak. Ug mismo dire sa Talaingod maghimo ta og Agriculture College dire sa Salawao, Ngano man? Kay kamo usa ka munisipyo para sa agriculture kay dako kaayo ang inyong yuta. . Kinahanglan matabangan mo kay nia ang pinakadako nga opportunity dire, ang inyong kaugmaon sa karon ug sa inyong future generation. . Kini ang inyong pag-asa. . Tabangan ta mong tanan nga ma-develop ang inyong yuta, inyong ancestral domain,” midugang si Kuya Gov nga misaad nga iyang paliton ang tanang produkto sa mga IPs aron dunay maayong presyo.

Kay nailad, ang lapad nga kayutaan sa mga IPs napasagdan.

“Ang inyong yuta nahimong useless. Ngano man? Kaniadto tua mo sa Cebu, Manila, Davao, gigamit lang mo didto sige mo’g baktas-baktas, sigeg rally, sigeg kasuko sa gobyerno . . Nakalimot mo nga ang makahatag og asenso sa inyong kinabuhi is naa ra dire sa inyong sitio sa Talaingod. Kay naa dire ang inyong dagkong yuta. . kulang lang sa pag-develop, walay tanom kaya walay income,” pagklaro sa Davao del Norte gobernador.

Tungod kay ilang nasinati nga gitubag gayod ang ilang mga mulo, misaad ang mga IP leaders nga ila gyod kumbinsihon ang ilang mga paryente nga mobalik sa sabakan sa tinuod nga gobyerno.

*****************///

Misaad nga mosuporta na sa gobyerno 

Nanumpa 

Proyektong pabalay ilawom sa administrasyon ni Kuya Gov 

Patubig 

Karsada padulong sa hilit nga Sitio Mondol 

Ancestral Domain defender

Naghulat ang lapad nga kayutaan sa Talaingod nga tikaron aron molambo 

Nagtinabangay ang mga ahensya sa gobyerno nga mapalambo ang lapad nga kayutaan sa Talaingod 

 

DavNor News

nainggo