Way lama sa politika ang pagpanghatag sa mga relief goods sa mga biktima sa pagbaha sa pipila ka mga barangay sa probinsiya sugod Marso 1 hangtud Marso 3, 2022, tungud sa pila ka adlaw nga pag-ulan dala sa easterlies.

Sulti ni Provincial Social Welfare and Development Officer Rose Rapista nga mituman lang sa iyang responsibilidad ang probinysa ug nga patas ug wala kini'y gidapigan sa pagpanghatag sa mga food packs sa mga nabahaan.

“Makadawat gayod sa hinabang ang tanan. Walay pili,” sulti niya human sa iyang pagtunol sa mga relief goods sa Mesaoy, New Corella, Davao del Norte kagahapon, Marso 2, 2022.

Gipahingusgan ni Rapista nga wala nagatan-aw si Governor Edwin “Kuya Gov” Jubahib kung kinsa’y ginasuportahan sa mga benepisaryo, sanglit seryoso siya sa pagtubag sa panginahanglanon sa katawhang Dabaonon, labi na ang paghatag sa mga relief goods panahon sa pagbaha.

Dugang sa opisyal nga ang relief operation usa kini ka regular nga programa sa probinsya panahon sa kalamidad, diin obligado kini sa pagdugang sa gipahigayon nga relief distribution sa mga local government units.

Hangtud karong adlawa, dul-an 10,000 na ka pamilya nga nabahaan ang nahatagan sa mga food packs, apil ang mga biktima sa pulo ka barangay sa lungsod sa Asuncion.

Nanghatag sab ang probinsya og hot meals sa mga biktima sa baha sa Kapalong, Cuambogan, Tagum City, ug Cabaywa, Asuncion.

Kauban ni Rapista sa pangpang-apod-apod sa food packs sa New Corella sila Assistant Provincial Social Welfare and Development Officer Jeffrey Calamongay ug mga personahe gikan sa Municipal Social Welfare and Development Office (MSWDO).

Samtang kuyog sab sila Board Member Roger Laguna, Board Member Prospero Estabillo, Jr., Boar Member Francisco Remitar ug Board Member candidate Macario Bermudez, kauban si Dr. Joseph Nilo Parreñas ug mga personahe sa PSWDO ug MSWDO sa pagpanghatag og food packs sa Asuncion.

Mapasalamaton si Elmer Deloso, ang chairman sa Purok 19-A, Mesaoy, New Corella sa miabot nga hinabang sa ilang purok, bisan naglisod og paghatud niini ang probinsya gumikan kay taas gihapon ang tubig sa dalan padulong didto.

“Nagapasalamat mi kay Kuya Gov, sa tanang mga opisyales sa probinsiya ug kay Mayor Monet Federiso, sa tabang nga ilang gihatod kanamo,” sulti niya.

Sulti niya nga nangalata jud ang ilang pananum nga mga gulayon tungud sa upat na ka adlaw nga walay paghubas sa tubig-baha sa ilang mga uma.

Nanawagan sab siya sa panggamhanan nga sulbaron ang ilang problema sa dugay nga paghubas sa tubig-baha tungud sa kakulang sa drainage sa ilang purok.

 

 

 

 

 

DavNor News

nainggo