Isip usa ka hilit nga dapit nga layo sa mga nag-unang serbisyo, suplay, kagamitan, ug pasilidad, dako ang kalipay sa mga residente sa Talaingod dihang gipaduol na mismo sa Probinsyal nga Panggamhanan sa Davao del Norte ang nagkadaiyang serbisyo ngadto sa ilang lungsod pinaagi sa Oplan TApok sa Barangay Alang sa Nanginahanglan ug Galisod (Oplan TABANG).
Tumong sa Oplan TABANG nga gipangulohan ni Governor Edwin “Kuya Gov” I. Jubahib mao ang paghatod og tabang ug libreng mga serbisyo mismo sa tugkaran sa katawhan ilabi na ngadto sa Geographically-Isolated and Disadvantaged Areas (GIDAs) aron matubag ang ilang nagkadaiyang panginahanglan.
Padayong gitanyag sa Oplan TABANG ang libreng serbisyong medikal, sosyal, legal, agrikultural, ug beterinaryo sama sa libreng konsultasyon, dental, eye care, minor operations sama sa tuli ug cyst excision, gupit, pagpanghatag og wheelchair, cane, crutches, semilya sa prutas ug gulay, abono, veterinary medicines, ug uban pa.
Matod ni Datu Andil Ginum Paahan, taga Sitio Tibucag, Barangay Dagohoy, Talaingod, dili masukod ang ilang kalipay sa dihang natuman na gyud ang ilang tinguha nga makabenepisyo sa mga serbisyo sa gobyerno tungod ang Panggamhanan na mismo ang mipaduol ug mihatod sa nagkalain-laing panlawas ug katilingbanong serbisyo nga nakatabang gayud nila.
“Dugay na kami nangandoy og kanang maabotan mi’g mga ahensya nga klase-klase nga naggikan sa gobyerno. Sama karon sa mga nagtabang namo nga mga doktor, naghatag og mga prutas, naghatag og mga abono, unya naghatag pud siya og mga highway ug nagtabangan pud ang mga barangay namo… Mao na karon nga daghang salamat sa gikan sa gobyerno karon nga ginaila nami karon… Diha gyud ang dako nga pagpasalamat nako nga kaming mga lumad hapit nami makalingkawas sa kalisod kapait gumikan sa ilaha nga nag-alalay sa’moa—sa mga lumad”, saysay ni Paahan.
Gipahayag sab ni Julieto O. Bayawan Sr. gikan sa Barangay Palma Gil, Talaingod ang iyang dakong pasalamat sa Probinsya ug sa Provincial Social Welfare and Development Office (PSWDO) sa gihatag niining libre ug brand new nga wheelchair para sa iyang anak nga si 'Junior'.
"Dako mi’g pasalamat nga na’y nakatabang aning amoang anak nga naa siya’y ika-kuan sa iyahang kaugalingon… Layo man gud kaayo basta bukid lagi, unya layo kaayong center… Di pud siya kalakaw unya ang iyaha ani ginakuan lang nako ginalugaw, unya… gatas. Ug kaning kuan dili siya ka-istorya. Higda ra gyud ni siya. Kugus-kuguson lang siya. Ug kapuyon siya mag- muhigda, kugus-kuguson namo… Dako ko’g pasalamat nga nahatagan siya’g- naa siya’y malingkuran nga pariha ani nga na’y wheelchair", sulti ni Bayawan.
Samtang anaa sab ubang mga ahensya nga misalmot sa maong kalihokan sama sa 56th Infantry Batallion (IB) ubos sa 1003rd Brigade (Bde), Philippine Army kinsa mitabang sa paghatag og libreng serbisyo sa pagpagupit.
Ang Oplan TABANG sa Talaingod, sabay sa Lungsod sa San Isidro, mao ang kataposang lokasyon nga gi-adtoan sa Oplan TABANG Caravan sa kapin usa ka bulan nga paglibot niini sa tibuok Probinsya nga gisugdan kaniadtong Pebrero 22 sa Talicud, Island Garden City of Samal.
Writer: Gwyn Kelly O. Lobitos
