STO.TOMAS, DavNor--TUKORON sa probinsyal nga panggamhanan sa Davao del Norte ilawom sa administrasyon ni Gobernador Edwin “Kuya Gov” Jubahib ang usa ka Iinfirmary hospital nga mahimutang sa Barangay Casig-ang.

Sa inisyal P15 Milyones nga pondo, gipahinabo ang groundbreaking Martes, Marso 22, 2022 diha sa 1.5 ektaryas nga luna nga gipanag-iya sa LGU Sto. Tomas. Matod sa DavNor Provincial Engineering Office sugdan dayon ang site preparation works sunod semana.

“Kini nga hospital mao ni ang atong giapil sa KUYA GOB development agenda. Mao ni atong gipaningkamotan, giuna nato ang programa sa panglawas. Sayod man mo nga pagka-governor nako gi-declare dayon nako nga zero-billing, nga ang katawhan walay bayaran sa tambal ug serbisyo sa atong tulo ka district hospital. Pero nakita nako nga dili paigo kay concentrated lang ang serbisyo, Kapalong ug Carmen. Daghan ang maghulat alang sa serbisyo sa panglawas. Mao nang nahunahunaan nako nga kinahanglan ang tanang munisipyo butangan gyod og provincial hospital. Mao nang gitukoran nako. . kining Sto. Tomas Infirmary Hospital,” matod ni Gobernador Jubahib atol sa groundbreaking ceremony.

“Basig matingala mo dire gibutang sa Barangay Casig-ang. Tungod kay ang Casig-ang maoy duol nga access sa lungsod sa Dujali. . . Kining atong hospital ato ning tabangan, ayohon nato, kinahanglan nato ang support sa katawhan para mahimo nga magmalungtaron ug magmaayo ang atong serbisyo sa atong infirmary hospital,” mipasabot si Kuya Gov nga nagpasiugda nga gikinahanglan gayod ang suporta sa publiko.

Gikalipay pag-ayo ni Sto. Tomas Mayor Ernesto Evangelista nga “natawo ra gyod ang damgo” nga hospital.

“Natawo na gyod! Naa na gyod karon! Dili man gyod nato makuan ang tanan pero pasalamat ta , pasalamat ta nga natawo na gyod sa paningkamot sa atong halangdong Gobernador Kuya Gov Edwin Jubahib. . Dili lang Sto. Tomas ang makabenepisyo ani nga hospital. Apil sa plano sa atong gobernador nga pati ang lungsod sa Dujali makabenepisyo pod sila. . Usbon nako pasalamat gyod ta nga ang atong hangyo, ang atong gidamgo nga hospital matawo na gyod,” malipayong pahayag ni Sto. Tomas Mayor Ernesto Evangelista.

Misaad sab ang CWS (Construction Workers Solidarity) partylist pinaagi ni Ms. Melanie Momo nga modugang kini og P20 Milyones alang sa pagtukod sa hospital building.

Gumikan sa maayong pagdumala sa probinsya, gipasidunggan sa National Builders and MOSLIV Awards 2022 ingong Governor of the Year si Kuya Gov ug ang Davao del Norte ingong Most Sustainable and Livable Province in the Philippines.

******************///

 

 

 

 

 

DavNor News

nainggo