Gihatagag pasidungog sa Probinsyal nga Panggamhanan ang mga Local Government Units (LGUs) sa mga siyudad ug munisipyo sa Davao del Norte isip pag-ila sa aktibong kontribusyon niini sa ‘overall competitiveness’ sa probinsya.

Gawas sa Virtual Regional Competitiveness Awarding kaniadtong Pebrero base sa survey sa Cities and Municipalities Competitiveness Index (CMCI), nagpahigayon ang Probinsya nga gipangunahan ni Governor Edwin “Kuya Gov” I. Jubahib ug ang Department of Trade and Industry (DTI) - Davao del Norte og pinaka-unang Provincial Competitiveness Awarding niadtong Marso 16, 2022, sa DavNor Sports Complex Gym.

Segun sa mensahe ni Kuya Gov nga gihatod ni Executive Assistant Anselmo Junio, tumong sa maong provincial level awarding nga ilhon ang hiniusang paningkamot sa tanang siyudad ug munisipyo sa Davao del Norte ug ingon man ang indibidwal nga mga kalamposan niini.

“As we have known, the main objective of this program is to give recognition to our component cities and municipalities for their commendable efforts and initiatives in making the province a haven for investors. This also measures our performance in working towards economic dynamism, government efficiency, infrastructure, and resiliency”, matud ni Kuya Gov.

Sulti sab ni Provincial Administrator's Office-Davao del Norte Investment and Promotion Center (PADO-DNIPC) Head Joevynar M. Miedes nga ang matag LGU nakatampo gayud sa nasudnong tumong sa probinsya ngadto sa ‘competitiveness’ ug pagpalambo sa ‘investment environment’, hinungdan nga angay silang ilhon ug pasalamatan pinaagi niining 1st Provincial Competitiveness Awarding.

“This is one way na ato pu’ng i-recognize ug pasalamatan ang atoang mga Local Government Units kay kung dili tungod sa ila, atong collaborative effort, dili nato makab-ot ang atoang Second Most Competitive Province in the entire Philippines and this is the fifth na time na nakab-ot nato ang Most Competitive Province in Davao Region. So kailangan lang gyud sila i-recognize ug pasalamatan usab, and at the same time… kung pwede lang gyud nga ato gyung ma-maintain ba ang atoang ranking sa competitiveness sa Cities and Municipalities Competitiveness Index”, ingon ni Miedes.

Sa seremonyas, nakadawat ang mga mayor ug Local Chief Executives (LCEs) sa matag siyudad ug munisipyo sa probinsya og mga plake ug sertipiko isip pasidungog alang sa Most Competitive LGUs sa Davao del Norte.

Giranggo ang mga LGUs sumala sa ilang overall competitiveness nga gibase sa upat (4) ka pillars sa CMCI nga mao ang: economic dynamism, government efficiency, infrastructure, ug resiliency.

Samtang nagpadayon ang pag-uswag sa CMCI program, gikonsiderar sa DTI Competitiveness Bureau uban sa mga Regional Competitiveness Committees (RCC) sa tibuok nasud ang pagdugang sa “innovation” isip ika-limang (5) pillar sa CMCI alang sa survey karong tuiga.

“This year, dungagan nato ang pillar nato. Gi-include nato ang ginatawag namo’g Innovation Pillar, para ma-determine pud kung unsa pud ka-masigasig ang atoang mga LGUs to pursue kanang mga initiatives on innovation, kanang mga research and development, kay competitive na man gud ang mga lugar. So dapat kana pud nga area on innovation matan-awan pud na nila or hatagan pud nila’g pagtagad”, pagpasabot ni DTI XI Regional Director Maria Belenda Q. Ambi.

Gidayeg sab sa DTI XI Regional Director ang inisyatibo sa mga opisyales sa Probinsyal nga Panggamhanan ug DTI - Davao del Norte sa pagpahigayon og provincial level nga Competitiveness Awarding.

“Actually, nalipay pud mi nga naay mga initiative ang atoang mga probinsya to give tribute to their Local Government Units sa competitiveness kay lahi man pud gyud gud ang national, ang regional, ug ang provincial. In this way, murag ma-encourage nila ang ilahang mga cities and municipalities as well as the province nga mu-improve gyud sa ilahang competitiveness index. So, this is really a good manifestation of support from the Local Government Units especially from the Provincial Government”, gipahayag ni Ambi.

Dugang pa ni DTI - Davao del Norte Provincial Director Romeo L. Castañaga nga kining maong pagpasidungog gipahigayon nila sa tuyo nga mas maduso pa ang mga LGUs nga magpadayon sa pagpaningkamot alang sa kalamposan, gamit ang CMCI isip himan sa pagplano aron molambo kung asa sila huyang ug motubo diin sila lig-on.

Writer: Gwyn Kelly O. Lobitos

 

 

 

 

 

 

 

 

 

DavNor News

nainggo