Isip suporta sa pagsugod sa ilang bag-ong kinabuhi, 31 ka mga Former Rebels (FRs) ang natunolan og pinansyal nga hinabang ubos sa Enhanced Comprehensive Local Integration Program (E-CLIP) kaniadtong Marso 4, 2022 sa VIP Clubhouse, Davao del Norte Sports and Tourism Complex.

Gipangulohan sa Department of the Interior and Local Government (DILG) isip implementing agency sa E-CLIP ang maong turn over ceremony uban ang mga opisyales ug representante sa Probinsyal nga Panggamhanan sa Davao del Norte, Armed Forces of the Philippines (AFP), ug Philippine National Police (PNP).

Gipasabot ni National Barangay Operations Office (NBOO) Director III Debie T. Torres ang tumong sa E-CLIP, nga mao ang pagtubag sa mga mulo ug panginahanglanon sa mga FRs pinaagi sa paghatag og financial and livelihood assistance alang sa pagpanday sa ilang bag-ong kinabuhi balik sa sosyodad.

“Ang hinungdan ug purpose sa atoang pagbisita aron maghatag og mga tseke sa atoang mga friends rescued or mga former rebels maong pagpakita nga tinud-anay ang gustong tabang ug pag-agni sa atong gobyerno ngadto sa mga former rebels nga muuban kanato aron mahatagan sila’g ayuda sa pagsugod sa bag-ong kinabuhi aron mahimo silang tinud-anay nga ma-reintegrate sa atong sosyodad ug mahimong tinud-anay nga partner sa atoang gobyerno”, ingon ni Torres.

Gisiguro ni Torres nga napaabot gayud ngadto sa mga FRs ang husto ug ensaktong tabang nga ilang gikinahanglan ug iyang gipasalig nga makareklamo sila kung adunay gisaad nga mga benepisyo ang gobyerno nga wala matuman.

“Kay trabaho man nako nga i-assess, i-evaluate, and i-monitor, trabaho namo na sa DILG. So amo mong pangutan-on. Ayaw mo’g kahadlok ana nila. Ato silang partners. Atong singlon kung di tinuod nga naa sila’y gihatag ninyo… Sila adunay kaakohan nga mutabang aron mahibalik mo sa gitawag nato og sosyodad diha sa atong karabangayan”, sulti ni Torres.

Agig balos, gipasaad sab ni Torres ang mga FRs sa mga kaakohan nila isip mga miyembro na usab sa katilingban karon nga mibalik na sila sa sabakan sa gobyerno.

“Dili lang ang gobyerno dunay kaakohan aning atong pamuyo diri sa Pilipinas… Dili lang ang gobyerno. Partner ta… Unsay inyong kaakohan?... Magpuyong malinawon kauban ang pamilya sulod sa barangay. Promise?... Kung magpatawag og tapok sa barangay, barangay assembly, magtabang og dayong og balay, mupanday og purok, or mangguna sa kilid, mutabang ug mu-attend… Kung dunay issue na nadunggan, nasinati-an… Dili lang pud dayon ta magrebelde. Pwede man pud gud ta magpahibalo... Kay kung dili mo magpahibalo, dili pud mi makahibalo”, hangyo sa NBOO Director.

Mipahayag og positibong tubag ang mga FRs bahin sa kung giunsa sila pagtratar sa gobyerno busa sila misaad sab nga mosalmot sa tanang mga kalihokan nga ipahigayon sa ilang komunidad.

“Tungod ana inyong saad, kami pud nga inyong partners diri sa gobyerno, atong kapulisan, atong army, atong mga barangay officials, atong DILG, social welfare, TESDA, DOLE, maningkamot pud mi nga maka-ayuda ug anaa kanunay sa inyong kiliran aron makahatag og tabang isip inyong partners”, pasalig ni Torres.

Gipaambit sab ni Davao del Norte Provincial Governor Edwin “Kuya Gov” I. Jubahib ang mga lakang nga gihimo sa Probinsyal nga Panggamhanan subay sa tumong sa Nasyonal nga Panggamhanan nga mahunong ang problema sa insurhensya, pinaagi sa pagtubag sa mga mulo sa FRs sama sa isyu nila sa kalsada, tubig, eskwelahan, ug panginabuhi-an.

“Mao kini ang hinungdan nga ang atong mga kaigsoonan nga dugay na nga wala matagad sa national government karong panahona kamo na’y naka-sentro sa serbisyo sa atong gobyerno. Ug dinhi sa atong probinsya sa Davao del Norte mao pud ni ang gipaningkamotan sa KUYA GOB agenda nga ang atong mga kaigsoonan nga… wala kakita’g barangay captain, wala kakita’g mayor, wala naadtoan og governor sa inyong mga lugar… ako na mismo ang niadto sa inyong tagsa-tagsa ka mga tugkaran, para sa purpose nga hangyuon mo nga mubalik-loob sa atong gobyerno”, ingon ni Kuya Gov.

Mapasigarbuhon nga giasoy sa gobernador nga nagbunga gayud ang mga paningkamot sa gobyerno sanglit daghan na nga mga kanhi rebelde ang mi-surrender ug mibalik sa sabakan sa gobyerno, partikular na sa Davao del Norte.

“Kita kaayo nato nga ang atoang mga pagpaningkamot nga magkahiusa ang katawhan ug ang gobyerno ug maundang na kining programa sa insurgency laban sa gobyerno nga karon diri sa Davao del Norte napakita nato nga nagmadaugon ang gobyerno sa kampanya sa kahapsay ug kalinaw… Karon proud kayko nga masulti nga kita diri sa probinsya hapit na i-declare nga cleared province and zero recruitment laban sa NPA… Lami kaayo paminawon nga dili na kinahanglan magpatay ang kapwa Pilipino kung dili kusa na mo nga mubalik-loob sa atong gobyerno nga walay giyera nga mahitabo”, saysay ni Kuya Gov.

Gihangyo usab ni Kuya Gov ang mga FRs nga awhagon ang ilang mga kanhi kaubanan nga naa pa sa kabukiran sa pagkanaog ug pagbalik na sa pagkamaunongon sa gobyerno kay kini andam sa pagtabang ug pagtubag sa ilang mga mulo.

“Ug ako muhangyo sa inyoha nga kung aduna pa moy mga paryente, kauban nga nagpadayon nga anaa sa bukid, kamo mismo ang musulti sa ilaha nga ‘surrender na mo’... Ang tinuod nga kaugmaon nga inyong gipangandoy naa dinhi sa atong komunidad kauban ang atong mga lideres nga maghatag og tabang para sa pag-asenso sa inyong pamilya… Ang gobyerno naghatag og tinud-anay nga kampanya nga matabangan mo sa inyong kalisdanan ug mahimong luwas ang inyong pamilya”, pagdasig ni Kuya Gov.

Samtang mipadayag sab sila Davao del Norte Police Provincial Office (DNPPO) Provincial Director Police Colonel Antonio D. Alberio ug Philippine Army 10th Infantry Division Commander Major General Nolasco A. Mempin sa ilang dakong kalipay alang sa pagbalik sa mga kanhi rebelde ug gipasaligan sila nga ang suporta ug paggiya sa AFP ug PNP magpabilin nga makanunayon, subay sa mandato sa ilang mga ahensya.

Sa 31 ka mga FRs nga nakadawat og hinabang pinansyal, walo ( ang gikan sa Davao del Norte Police Provincial Office (DNPPO), unom (6) gikan sa 89th Infantry Battalion, 16 gikan sa 56th Infantry Division, ug usa (1) gikan sa 1003rd Infantry Brigade, diin 28 niini ang Regular New People's Army (NPAs) samtang tulo (3) ang kanhi miyembro sa Militia ng Bayan.

Writer: Gwyn Kelly O. Lobitos