HANGTOD Marso 15, 2022, miabot na sa 41,889 ka mga manok ang nahatag sa 381 ka mga People’s Organization (PO) nga benepisyaryo sa programang KAAGAPAY ug kini nagpadayon.

Kahinumduman niadtong Hunyo 2020, gilusad ni Gobernador Edwin “Kuya Gov” Jubahib ang programang KAwsa sa AGrikulturA ug PAnginabuhian sa barangaY (KAAGAPAY) nga bisan ‘dili makadato’ apan aron masagubang ang kanihit sa pagkaon gumikan sa COVID-19 pandemya pinaagi’g pagtanom og mga gulay ingon man pagbuhi’g manok nga tanan semilya ug piso gihatag libre sa probinsya.

“Kini atong KAAGAPAY mao ning akong nakita nga pinakaimportante sa inyoha. Tungod kay ako anak sa pobre, sa usa ka mag-uuma. . . mao ning akong nakita nga mahimong tubag para matag pamilya magkaroon og additional income, para ang pamilya mahatagan og kausaban sa kinabuhi. Dili man nato gikinahanglan nga mahimong milyonaryo apan kabalo ko nga atong gipangandoy mahimong bastante ang atong pamuyo,” mensahe ni Kuya Gov sa pagsugod sa KAAGAPAY dispersal sa manok.

Gawas sa ‘Sustainable Livelihood Training Course on Free Range Chicken lectures’ aduna sab feeds nga gihatag aron ipakaon sa binuhing manok samtang padayon gi-monitor sa mga KAAGAPAY staff ang mga binuhi.

Sa dili momenos 45 ka adlaw nga pag-atiman (growership), paliton pagbalik sa KAAGAPAY ang dagko nang manok sa rasonable nga presyo-palengke ug maghulat na sab sa sunod dispersal sa piso ang mga POs.

Tumong sa KAAGAPAY nga “dili lang igo ang paghatag og pagkaon kundili ang pagtudlo sa mga benepisyaryo sa mga pamaagi unsaon maka-produce og pagkaon.”

Sa nadawat nga kahibalo, andam na ang 22 ka POs nga sila na ang mopadagko, mopasanay ug mahimong tag-iya sa 1,100 ready-to-lay (RTL) nga manok (50 heads/PO) nga gihatag sa KAAGAPAY ilawom sa “Retention” nga sistema. Sa gihapon motabang ang KAAGAPAY pinaagi’g paghatag libreng pagkaon sulod sa tulo ka bulan, i-monitor ang kahimtang sa mga manok uban ang libreng tambal ug bitamina ug dili na kinahanglan nga duna’y iuli ang PO. Sila na ang magpa-itlog, magpa-piso, magpa-dagko hangtod mabaligya nga andam gihapon paliton sa probinsya ang ilang produkto kung ilang gusto nga ibaligya.

Bisan mao pa’y pagsugod sa “Retention” positibo kaayo ang KAAGAPAY nga magmalampuson ang mga POs sa ilang tinguha.

Ang ubang PO-benepisyaryo naghimo’g dugang paningkamot. Gikan sa ilang nadawat halin sa manok, ang Purok 1B Igangon, Sawata KAAGAPAY Farmers Association nagpalit og duha ka baktin, gipadako og nahalinan sobra P32,000 paglabay lang sa sobra duha ka bulan. Ang uban gipa- “lending” ang ilang halin taliwala ra sab sa mga miembro sa PO.

Giangkon sa ubang benepisyaryo sa programa nga wala sila madato apan daghan na kanila ang nakapalit og carabao, motorsiklo, chainsaw, hinay-hinay nakapatukod og balay ug nakapalit pwesto sa palengke gumikan sa halin sa KAAGAPAY gulay ug sa tabang sa mga KAAGAPAY staff.

***********************///

 

 

 

DavNor News

nainggo