Nakab-ot sa Oplan TABANG ang tinguha niini nga maserbisyohan ang mga nanginahanglan ug galisod samtang padayon ang pagtubag sa nagkadaiyang panginahanglanon sa katawhan pinaagi sa pagdalit og mga panlawas ug katilingbanong serbisyo.

Dako ang pagpasalamat sa mga residente sa Carmen sa nadawat nila nga libreng mga benepisyo sa dihang gipalugwayan ang pagsilbi sa Oplan TABANG ngadto sa ilang lungsod.

Matod ni Charlyn Maldani gikan sa Barangay Asuncion, Carmen, kinsa giubanan ang iyang anak alang sa libreng tuli, nga dako gayud nga tabang kanila ang mga libreng serbisyo nga hatod sa Probinsya ug igo na lang sila migasto para sa pamasahe.

“Dako jud kaayo’g [tabang] para sa’moa… kay libre na tambal… Nanganhi mi diri, pamasahe lang ang among gi-kuan, kay para malibre mi… Daghan kaayong salamat sa libreng tuli karon kay naka-avail gyud mi”, sulti ni Maldani.

Nalipay sab si Aprillyn Ariza nga taga Barangay Anibongan, Carmen kay nasulbad na gyud ang dugay na niyang problema bahin sa pag-correct sa gender sa iyang birth certificate pinaagi sa legal services nga gidalit sa Provincial Legal Office (PLO).

“Akong gipa-avail ang correction of gender of birth certificate… Dako kaayo nakong pagpasalamat sa kay Kuya Gov diria sa Davao del Norte nga siya gyu’y nagtabang sa among mga mulo nga ingani gyud—ang ma-correction jud ang among mga pangayo nga mga birth certificate,” ingon ni Ariza.

Samtang giasoy ni Daisy De Guzman nga lumulupyo sa Barangay Ising, Carmen nga igo ra pangpalit og pagkaon sa matag adlaw ang kita niya gikan sa pagpamaligya og lemon, hinungdan nga wala gayud siya nakahigayon sa pagpakonsulta sa iyang pisikal nga kahimtang.

“Nahirapan gyud ako ma’am maghanapbuhay… Hanapbuhay ko magtitinda ng lemon… Ang income ko sa lemon tama-tama ra lalo na kay mahal ang kilo sa lemon… Hindi na gani ako makabawi sa’kong kapital. Tama-tama ra ibili ng bigas at saka ulam”, saysay ni De Guzman.

Hingpit nga mapasalamaton si De Guzman sa Probinsyal nga Panggamhanan tungod nakahigayon na gayud siya nga mahatagan og pagtagad ang iyang panlawas pinaagi sa libreng medical consultation ug libreng tambal nga gipanghatag sa Provincial Health Office (PHO) atol sa Oplan TABANG.

“Nagpacheck-up… sa high blood ug sa hindi ako makatulog, hindi ako makakain ng masarap… Nagpasalamat ako ng dako nga ang bilang nila ng tulong sa akin”, dugang ni De Guzman.

Gawas sa nahisgutang mga serbisyo, gitanyag usab sa Oplan TABANG ang libreng dental services, eye care services, minor surgeries, X-ray, gupit, pagpanghatag og tsinelas, mga abono ug semilya sa mga gulay ug prutas, purga ug multivitamins alang sa mga kahayopan, ug daghan pa.

Ang Oplan TABANG usa ka inisyatibo sa Probinsyal nga Panggamhanan sa Davao del Norte nga gipangulohan ni Governor Edwin “Kuya Gov” I. Jubahib, sa pagtinambayayongay sa lain-laing opisina ug ahensya sa gobyerno nga may hiniusang tumong nga matubag ang mga panginahanglanon sa katawhan.

Writer: Gwyn Kelly O. Lobitos

 

 

 

 

 

DavNor News

nainggo