ALAS SAYIS pa lang sa buntag naglinya na si Mrs. Adelaida uban sa tulo ka apo gikan sa Purok 6, Barangay Tubod, Carmen nga nagtuo sila ang pinakauna ug makauli dayon.

“Sayo gyod mi. . alas sayis pa gani mi dire pero hapit na ma-100, pag-abot namo 77 na among number. Naa pa gyod alas singko pa ningari. . . Wala gani mi nagbaon kay nagsayo aron makauli’g sayo, sus, ing-ani man diay kadaghan ang tawo, 77 na mi, alas sayis. Naa pa gyod diay sayo, alas singko. Abi nako’g una gyod ta ron, nah pag-abot dire perte naman gyong daghana diay. Shock gud ko nga nah, naa pa man gyod diay sayo nato. Agwantahon na lang,” matod ni Lola Adelaida nga Secretary sa Purok 6, Barangay Tubod.

Dala sa administrasyon ni Gobernador Edwin “Kuya Gov” Jubahib, gidugok sa halos usa ka libo ka tawo ang Oplan TApok sa Barangay Alang sa Nanginahanglan ug Galisod (TABANG) sa Barangay Tubod nga ang IT section naka-rehistro na sobra 900 ka indibiduwal wala pa’y alas onse sa buntag.

“Mahal kaayo ang private, hapit libo baya wa pa’y labot ang tambal. . Mao na hulat na lang mi’g libre, bahala’g agwanta’g barog. . . Mantinilan na lang nako’g tubig kay wa ra ba mi mga kwarta. Mamasahero mi’g pauli, traynta, unya kaning tulo, kwarenta among pamasahe. Namaktas mi padulong dire kay ngiyawat lagi sa pamasahe. . Gipalitan na lang gani nako’g whiterabbit (candy) kay pugong-pugong ba sa ilang gutom kay wa man mangaon sa lugaw. Ako’y natagbaw’g hurot, tulo ka baso,” padayong pagsaysay ni Lola Adelaida.

Ingong purok secretary nasayod pag-ayo si Adelaida nga bisan air-conditioned ang ilahang Barangay Health Center apan ikasubo nga wala kini mga tambal. Kinahanglan pa moadto sila sa lungsod sa Carmen apan kulang gihapon ang tambal.

Wala kapugong ang Purok Secretary nga nagpadayag sa pagka-dismayar sa ubang residente nga hangtod 75 lang gi-serbisyohan sa dental bisan gipasabot nga kulang kaayo ang mga dentista.

Ang Tubod Elementary School Health program in-charge nga si Ms. Gina nagbutyag sab sa tinuod nga panginahanglan sa taga Tubod.

“Kung mahimo naa pod ni siya pirme, sa health; sa pag-atiman sa mga tawo kay dili man gud tanan mga residente makakaya para maka-medikal. Kung naay mga libre, mosugot na lang ni sila patay-patay’g linya basta naay libre, linyahan na nila. Kinahanglan ni sa mga tao dire kay daghan gyod dili maka-afford, dili makakaya. . Kung pwede annually, kaduha. . why not? Kay dili man ma-cater tanan, parehas sa tuli 200 lang. Daghan nagapila ganiha nanguli kay 200 lang ma-cater. . Ginaapas nila bahala’g magutom kay libre man sila,” matod ni Maam Gina.

Bisan sa mga “limitasyon” mapasalamaton kaayo si Ederlina Sequeña.

“Nalipay mi nga naay libre, consultation. Dako pod ug ikatabang sa mga tao nga walang-wala kay kung magpa-check-up ka, 500. Kani libre, salamat kaayo,” matod sa Tubod ES titser.

Gituyo ni Kuya Gov nga ihatod diha sa “tugkaran” ang Oplan TABANG aron makahatag hinabang ilabina sa medical nga panginahanglan.

*****************///