Gawas sa mga kasagarang serbisyong ginapaambit sa OPLAN TABANG sama sa Medical og Dental consultation, COVID-19 vaccination, libreng gupit, libreng tambal, libreng eyeglasses, libreng tuli, pag pang apod-apod og libreng tsinelas, libreng tambag legal, libreng veterinary services, ug libreng semilya sa prutas ug gulay, gi-highlight ug gihataga’g dakong pagtagad ang educational assistance nga natagamtaman sa mga provincial scholars.

“Life changing” alang sa mga eskolar ang nadawat nga scholarship ilabina karong panahon sa pandemya nga adunay kalisod sa pagpangita og kwarta pangbayad sa tinuig nga matrikula ug tungod aning cash assistance lakip sa scholarship, nakunhuran ang pinansiyal nga pas-anon sa ilang ginikanan.

Dungan sa paghatod sa Probinsyal nga Panggamhanan sa Davao del Norte sa mga nagkalain-laing serbisyo nga gikan sa nagkada-iyang mga opisina sa Kapitolyo ang paghatag usab sa cash assistance nga P6,000 alang sa 73 ka eskolar.

Matod pa sa first-timer nga provincial scholar na si Angelo de Montejo, na menusan ang ilahang kalisod ilabina sa panahon sa pandemya nga daghan ang nawad-an og trabaho sanglit aduna siya’y dugang kwarta panggastos sa mga panginahanglanon sa pag-eskwela.

“Dako siya’g tabang sa akoa especially sa akong pag-eskwela kay at least naa koy extra money ba panggastos sa eskwelahan ilabina karon nga pandemic wala ju’y kapangitaan og kwarta. Dako sab ni og tabang sa akong pamilya labi na karon nga lisod kaayo sa ilaha ang trabaho ang uban kay nag stop pa [og skwela] tungod sa sitwasyon sa pandemic,” pagpadayag ni provincial scholar Angelo.

Gipaabot sab ni Angelo ang iyahang dakong pagpasalamat sa Probinsyal nga Panggamhanan sa Davao del Norte ubos sa liderato ni Gobernador Edwin “Kuya Gov” Jubahib sa scholarships nga gihatag ug nagdahom siya nga daghan pa ang matabangan ani nga makahuman og skwela.

“Nagskwela ko karon sa KCAST sa Kapalong College of Agriculture Science and Technology, first year ko under sa BSBA Marketing. Dako kaayo ko’g pasalamat sa atong governor sa iyang gipahigayon nga programa sa scholarships unta kani na programa magpadayon aron daghan pa kaayo’g estudyante ang matabangan nga makahuman sa ilahang pag-eskwela,” sulti ni Angelo.

Ang pondo nga gigahin alang sa scholarships nag gikan sa Probinsyal nga Panggamhanan sa Davao del Norte nga parte sa Development Agenda ni Kuya Gov ilalom sa letrang K nga Knowledge Management, Education, and Sports.

Gisaysay ni Provincial Administrator’s Office - Employment and Workforce Development Division (PAdO-EWDD) Head Gloria S. Pamugas ang mga benepisyong madawat sa mga eskolar ug ang impak niini sa mga kabatan-onan ug sa ilahang ginikanan.

“Sa atong scholarship assistance sa mga ni qualify sa full tuition fee, full ang bayaran direkta sa ilang giskwelahan basta dili mulapas og P20,000 per semester kada scholar. For our educational assistance, matag qualified scholar makadawat og P6000 per semester or P12,000 in a year. Ang impact sa maong programa unang-una nakatabang sa pagpadayon sa ilang pag eskwela, ilabina karong panahon sa pandemya. Ikaduha, gamay nga abag-abag sa ilang mga ginikanan in terms of their responsibility sa paghatag og maayong kaugmaon para sa ilahang mga anak,” pag explikar ni PAdO-EWDD Head Gloria Pamugas.

Sa pagkakaron adunay 435 ka mga provincial scholars, 70% niini nakadawat og full tuition fee ug kapin kon kulang 300 ang nakadawat og educational allowance per semester gikan sa ilahang pagsugod hantod mahuman ang ilahang pagtuon.

 

 

 

DavNor News

nainggo