Nagkahiusa ang lokal nga panggamhanan sa Probinsya sa Davao del Norte ug ang armadong sektor sa tumong nga mapatunhay ang kalinaw ug kahusay sa probinsya ug mapanalipdan ang mga Dabaonon gikan sa lainlaing hulga sa seguridad.

Gipasalamatan ni Governor Edwin “Kuya Gov” I. Jubahib ang Armed Forces of the Philippines (AFP) ug Philippine National Police (PNP) sa mga paningkamot niini nga mapalig-on ang pwersa sa seguridad sa probinsya atol sa Multi-Sectoral Consultative Meeting kaniadtong Pebrero 16-17, 2022 sa DavNor Gym.

"Ginahimo namo ni… agi'g pasalamat sa tanan ninyong performance… dinhi sa probinsya sa Davao del Norte. Then, sa atoang mga nahimo nga mga accomplishment… with tandem sa atong provincial government ug sa Philippine National Police in the Province of Davao del Norte, and also sa Philippine Army," pahayag sa gobernador.

Mihisgot si Kuya Gov sa pipila ka mga kalihokan nga nahimong malampuson tungod sa pagtinambayayongay sa armadong sektor ug sa probinsyal nga panggamhanan sama na lamang sa pagsumpo sa insurhensya.

"Mao bitaw nga ang insurgency nato, naundang ta. Gi-declared na ta karon sa Armed Forces nga first cleared province and zero recruitment against NPA tungod sa atong pagtinabangay," butyag ni Kuya Gov.

Gidayeg sab ni Kuya Gov ang maayong pagdumala sa Regional Police's Revitalized-Police sa Barangay (R-PSB) nga mao'y nagasiguro nga mahatod gayud ang serbisyo sa kapulisan ug sa gobyerno ngadto sa mga anaa sa lagyong barangay.

"Ang probinsya sa Davao del Norte mao'y model sa R-PSB. So at least karon makita nga mura og himuon nang i-national ang atoang R-PSB tungod sa maayong performance," sulti ni Kuya Gov.

Matod sa gobernador, ang panaghiusa sa probinsyal nga panggamhanan ug sa armadong sektor maoy sekreto sa pagkab-ot sa kalinaw ug kalamboan sa probinsya.

"Mao ni akong pasalamat sa atoang tanan, sa atoang partnership… nga na-eliminate nato ang mga petty crimes, insurgency… pinaka-importante gyud nga magkahiusa… Kay dili man kaya mahimo [sa PNP ug AFP] without the support of the provincial government… Dili pud nako kaya ang peace and order sa Davao del Norte without your support… Mao na'ng akong gipasalamatan sa inyoha kay dili man pud nako na ma-achieve tanan without your individual support," ingon ni Kuya Gov.

Gipadayag sab ni Police Major (PMAJ) Rowena M. Jacosalem, Regional Focal Person sa Regional Police's Revitalized-Police sa Barangay (R-PSB) ang dakong kontribusyon sa probinsya nga gipangunahan ni Kuya Gov sa mga kalihokan sa PNP ilabi na sa R-PSB.

"Sa tanang deployment nato diri sa R-PSB, naa kanunay ang suporta sa atoang provincial government… Dako kaayo ang natabang sa atoang provincial government pinaagi ni Governor Jubahib. Ingon man sad, unang-una pud sa Revitalized-Police sa Barangay program, positive kaayo iyahang pagdawat sa atoa nga mamahimo tang kaagapay or katimbang niya sa tumong… nga humanon gyud nato ang problema sa insurhensya," butyag ni PMAJ Jacosalem.

Gihisgotan sab ni PMAJ Jacosalem ang mga programa nga gilusad sa probinsyal nga panggamhanan sa pakigtambayayong sa armadong sektor sama sa mga livelihood assistance, KAAGAPAY program, Pabahay project, ug reintegration programs alang sa mga Former Rebels (FRs).

Mipahayag sab sa iyang pasalamat si Police Lieutenant Colonel (PLTCOL) Verna L. Cabuhat, Chief of Police sa Panabo City kay Kuya Gov sa makanunayong suporta niini sa lokal nga pwersa sa kapulisan.

"Siya gyud ang una nga nitabang sa akoa na mabutang namo ang amoang telecommunication system, among radio transmitter… nga dugay-dugay gyud siya naguba nga naayos gyud niya… ug uban pa nga programa nga hangtod karon sukad nga nag-assume ko dinha, padayon gyud iyang suporta sa amoa. Ilabi na gayud sa mga police operations nga kulang mi og mga resources, muingon lang gyud na siya nga muduol lang mi sa ilaha," pagpasalamat ni PLTCOL Cabuhat.

Pinaagi sa hiniusang paningkamot sa probinsyal nga panggamhanan ug sa armadong sektor sa Davao del Norte, daghang pasidungog ang nadawat sa probinsya sama sa Most Livable Province, Most Business-Friendly Province, ug Most Competitive Province.

Writer: Gwyn Kelly O. Lobitos

 

 

 

DavNor News