Bug-os nga suporta ihatag sa mga negosyante

Gipasalig ni Governor Edwin "Kuya Gov" I. Jubahib sa mga negosyante sa Davao del Norte nga muhatag ang probinsyal nga panggamhanan sa ilang bug-os nga suporta alang sa sektor sa negosyo, samtang iya kining gitigom sa usa ka consultative meeting kaniadtong Pebrero 17-19, 2022.

Matud ni Kuya Gov, andam nga mutabang ang probinsya sa mga panginahanglanon sa lokal nga mga negosyo, sama na lamang sa land conversion.

"Even piso walay pwede mangayo sa inyoha. Ako mismo dili ko mangayo… Sa inyong land conversion, diri man gyud na sa province—sa assessor. Pag assess sa inyong yuta, pahangyuon pa mo nako kutob sa inyong makaya. Basta nga mu-put up lang mo’g negosyo. Ug muhangyo pako sa atong municipal or city mayors nga mahatagan mo’g tax holiday," pasalig sa gobernador.

Gisiguro sab ni Kuya Gov nga pantay ang pagkabahinbahin sa mga proyekto sa probinsya ngadto sa mga kontraktor, aron mahatagan og higayon ang tanan.

"Naa nay mga pipila na natagaa’g road project… Katong mga wala natagaan, bahinbahinon lang nato. Pero ginagmayay ra gyud ning province ha. Naa ra gyud tawon ni sa 1 million above. Murag pinakadako sa province nga project naa lang sa mga 3 million… Maningkamot ta nga makakuha pa og daghang proyekto… Unya karon ang mga kontraktor nagkinahanglan ma’g quarry. [Ang] quarry sa Davao del Norte gibahin-bahin nako kutob sa mag apply nga kontraktor… Tinabangay ta," butyag ni Kuya Gov.

Tumong sa gobernador nga palig-onon ang sektor sa negosyo ingon man pagpataas sa employment rate sa probinsya.

"Kung mahatagan mo og support sa province, sa LGU, ang sa amoa is adunay mu negosyo, syempre naa'y income ang probinsya ug ang LGU. And unsa may most interest nato? Ang employment sa mga tao," sulti ni Kuya Gov.

Dugang pa ni Kuya Gov nga sabay sa pagsaka sa employment rate sa probinsya ang pagkunhod sab sa ginagmay nga mga krimen sa katilingban.

"Kay kung walay employment, daghan ang maglisod pag kaon… Kung daghan ang maglisod pag kaon, daghan ang kawatan, daghan ang holdaper, daghan ang snatcher, daghan namaligya'g shabu, daghan ang mag-NPA. So ang interest nako kinahanglan nga adunay mga kompanya nga musalig sa probinsya para adunay taas nga employment rate nato sa Davao del Norte," ingon sa gobernador.

Ang maong tigum gitambongan sa mga kontraktor, quarry permitees, ug mga negosyante gikan sa lain-laing siyudad ug lungsod sa Davao del Norte nga mipadayag sa ilang pagpasalamat alang sa suporta nga gihatag sa probinsyal nga panggamhanan sa sektor sa negosyo.

Writer: Gwyn Kelly O. Lobitos

#OneDavNorOneTeam

#DavaodelNorte

 

 

 

DavNor News

nainggo