KATUYOAN gayod sa Oplan TApok sa BArangay Alang sa Nanginahanglan ug Galisod (Oplan TABANG) nga dad-on diha sa “tugkaran” ang daghang serbisyo nga gikalipay pag-ayo sa mga residente kay nagpamenos sa ilang gastos lakip na ang pagmenos sa ilang pag-antos.

“Kani dako kaayo’g tabang sa lumulupyo sa Panabo. Dako jud kaayo’g kahimoan sa amoa. Kay ngano? Una, paibot og ngipon. Ang kwarta nako igo ra jud sa kaon. Pero sa programa ni Kuya Gov dako kaayo’g kahimoan kay gawas nga di nako mag-antos, less pod ang gastos,” matod sa taga barangay Consolacion nga si Aireen nga nahuwasan sa sakit human giibtan og ngipon didto sa Kauswagan nga gipahitaboan sa Oplan TABANG, Marso 4.

Gawas sa Ibot sa ngipon ug libreng tambal, nakadawat sab si Aireen ug seedlings lakip na ang dako nga kalendaryo gikan sa Provincial Information Communication Knowledge Management Office alang sa sayon nga pagkonsulta sa mga adlaw ug petsa.

Ang IP nga pamilya gikan sa barangay Little Panay, Panabo City nagpasalamat pag-ayo kay mawala na ang “pag-antos” sa sungog-sungog nga “pisot” (uncircumcised).

“Di ko mosugot nga di matuli kay mahimong bata nga krimen (kriminal). Kay sagad man kanang kinomedya nga estorya magdugang, unya makit-an siya nga pisot, hangtod simbako makasumbag, dunggab, ana ba. Likay ta. Ikaduha pod, mas maanindot gyod ang bata matuli kay tubo,” matod ni Rene nga amahan sa gituli nga Rick Mar.

“Kuan man gud, ang among kultura nitibo, Ata-Manobo. Sa una ang mga tawo walay tuli. Pero mas nindot diay bata nimo matuli kay kusog motubo. . Kaliwat namo sa una wa gyoy tuli kay mag-bahag ra man halos sila sa una. . Nindot nga ipadayon gyod ni,” dugang ni Rene.

Nadawat sab sa pamilya ni Rene ang libreng tsek-ap, tambal bisan lugaw isip “pugong” nga magutom.

Alang sa senior citizen nga Cresenciana Baslan, dako na kaayo’g tabang nga siya nahatagan og libreng tambal nga iyang “maintenance.”

“Nagpasalamat mi kay makatabang sa amoa maghatag og maintenance. . makatabang sa mga kabos. Wala gud mi ikapalit og tambal unya malibre nami dire. . Daghang salamat Gob,” matod ni Cresenciana nga taga Purok B, Kauswagan nga nakabitbit og seedlings.

Dihang nabutang ang Davao del Norte ilawom sa COVID-19 Alert Level 2, gibalik dayon ni Gobernador Edwin “Kuya Gov” Jubahib ang Oplan TABANG nga ginahimo na sa wala pa ang pandemya niadtong 2019. Klase-klaseng serbisyo ang gihatod diha gyod sa “tugkaran” sa barangay nga naglakip sa medical, dental, legal, veterinary, minor operations (tuli), panghatag og wheelchairs, walking canes, tsinelas, anti-rabies vaccination, deworming, pagpanghatag og seedlings, fertilizers, libreng tsek-ap sa mata uban ang reading eyeglasses, x-ray ug uban pa.

Nagpahigayon sab kini sa RESBAKUNA aron matabangan ang mga LGUs nga mabakunahan ang mga residente.

Ang Oplan TABANG 2022 sa Kauswagan, Panabo mao na ang ika-7 nga paglibot niini.

****************///

 

 

 

 

 

DavNor News

nainggo