ANG KAWAD-ON mao ang pangunang hinungdan sa daghan nga nahimong child laborers.
“Bottom line is poverty. So kung matagaan og panginabuhi or tinubdan sa ilahang kwarta para pamugas, pwede na ang mga bata i-withdraw, dili na patarbahoon kay ang bata dapat libre sa pagdula, sa pag-eskwela ug sa pagtubo. Mao na’y atong target nga ma-eliminate ang child labor,” matod ni DOLE XI Focal on Child Prevention and Elimination Program Eduardo Monreal sa pagpahigayon sa “Angel Tree Project” sa DOLE DavNor Field Office, Marso 29.
Katuyoan sa Angel Tree Project kauban ang mga partners nga mahatagan paglingaw ang mga nahimong child laborers. Kasagaran ginahimo matag Disyembre apan na-postponed sa COVID-19.
Sa tibuok Rehiyon XI, nag-una ang DavNor Field Office sa pag-profile sa kabataang trabahante lakip na sa ilang ginikanan aron matino unsa nga mga tabang ang ipaabot para sa ilang panginabuhian.
“Ang ato gyod nga tumong sa Child Labor Elimination and Prevention Program is i-profile ang mga bata, i-assess ang ilahang mga needs apil ang mga parents para matabangan sila tanan ug mahaw-as sa ilang pagka-child laborer. . Human sa pag-assess, kung kinahanglan ibalik pa-eskwelahon, i-refer sa DepEd. Needs sab sa ginikanan (i-profile) nganong ang mga bata giapil sa trabaho,” pasabot ni Monreal.
Dako ang kalainan sa child laborer sa child labor. Ang child laborer gipatrabaho sa peligroso nga kahimtang sama sa minahan (mining). Kung sa agrikultura, bawal ang bata iapil sa pagdaro, pag-harvest nga maghawid og hait nga butang, pakatkaton magharvest og lubi, patrabahoon sa sobra nga oras.
Mahimong child labor gihapon ang usa ka gaan nga trabaho kung ang bata gibawalan sa pagtubo, pag-eskwela, gibawalan sa oras nga mopahulay samtang ang child work maoy kaatbang niini.
Emosyonal ang usa ka inahan nga mitug-an nganong nahimong child laborer iyang anak.
“Dili ingon nga ginasugo. Naa gyod sa iyaha ang desisyon nga motabang. . kanang walay sud-an, maningkamot siya nga maka-sideline, bisan ginagmay naay income. . dili unta nako gusto kay ing-ana iyang pangedaron, nine years old pa.”
Dinhi sa Davao del Norte, aron matabangan dunay dugang income ilabina ang mga “gagmay,” gilusad ni Gobernador Edwin “Kuya Gov” Jubahib ang programang KAAGAPAY pinaagi’g paghatag libreng semilya sa mga gulay ug abono ingon man mga manok ug feeds nga ilang padakoon nga paliton ra sab pagbalik sa KAAGAPAY.
“Tumong nato nga ma-matuto nato sila sa tamang paagi kay sila ang magsagubang sa kaugmaon sa atong komunidad sa umaabot nga panahon. Pinaagi sa pagpahiluna sa ilang mga gikinahanglan sa tanang aspeto, atong mahatag kanila ang oportunidad nga mamahimong responsableng miembro sa atong sosyedad. . Dako kini nga tabang sa atong mga kabataan nga ilang mabati nga sila kabahin sa atong panerbisyo. Makatabang sab kanila nga mahimong mas andam pag-gakos sa maayong kaugmaon, nga sila makabaton og paglaum nga makab-ot ang ilang mga pangandoy,” ang mensahe ni Kuya Gov alang sa mga opisyales sa DOLE, mga ginikanan ug sa mga batang trabahante nga gipaabot ni Executive Assistant Anselmo Junio.
