Makita sa pahiyom sa mga batang giila nga child laborers ang kalipay human sila nakadawat og klase-klaseng pahalipay gikan sa mga private partners ug sponsors pinaagi sa programang Project Angel Tree nga gipahigayon niadtong Martes, Marso 29 sa DavNor Gym.

Sa maong kalihokan, gitigom ang mga nailhang child laborers gikan sa nagkadaiyang Local Government Units (LGUs) sa Davao del Norte diin adunay gitanyag nga food carts, parlor games, magic show, ug aduna sab gipanghatag nga mga phone tablets, headphones, grocery packs, food packs, tsinelas, ug daghan pa.

Ang Project Angel Tree usa sa mga kalihokan ubos sa programang Child Labor Prevention and Elimination Program (CLPEP) sa Department of Labor and Employment (DOLE) Region XI nga nagtumong sa pagpanghatag og mga pahalipay ug benepisyo alang sa mga child laborers ug sa ilang mga pamilya uban sa suporta sa mga pribadong sponsors o ang ginatawag nilang ‘angels’.

“Kining Project Angel Tree ubos kini sa programa sa DOLE nga gitawag og CLPEP… Kay para man kini sa mga bata, ang makauban nato niini mao ang mga NGOs ug ang mga private establishment nga adunay kasing-kasing nga muhatag ngadto sa mga bata sa ilahang for example kanang mga bags, mga tsinelas, ug bisag unsa nga magamit sa mga bata. So amo na silang gi-tap kay kana silang mga private establishments, naa pud na silay kapasidad nga mu-alalay alang sa programa sa anti-child labor nga program”, saysay ni Eduardo P. Monreal, Labor and Employment Officer III ug DOLE XI Regional Focal Person on CLPEP.

Dugang pa sa CLPEP Regional Focal Person nga ang nag-unang katuyoan niini nga kalihokan mao ang pagpugong ug pagwagtang sa child labor pinaagi sa pagprotekta, paghaw-as, ug pagpabalik sa mga batang trabahante ngadto sa usa ka maamumahong sosyodad.

“Pero kani nga mga child laborers, ang ato gyud nga tumong sa programa… is i-profile ang mga bata, i-assess ang ilahang mga needs apil ang ilahang mga parents, para matabangan ni sila tanan ug mahaw-as sila sa ilahang pagka child laborer… so kung matagaan nato sila og panginabuhi or kanang tinubdan sa ilahang kwarta para pamugas, pwede na na nila nga ang mga bata, ato na nang i-withdraw. Dili na nato patrabahuon kay ang bata kinahanglan dapat libre sa pagdula, libre sa pag-eskwela, ug libre sa pagtubo”, pagpasabot ni Monreal.

Matod pa ni CLPEP Davao del Norte Field Office (DNFO) Focal Person Lalaine M. Apugan nga kining maong tinuig nga kalihokan nga gikatakda untang ipahigayon sa Disyembre, gitawag og ‘Project Angel Tree’ tungod tumong sa programa nga isabit sa usa ka Christmas Tree ang mga pangandoy sa mga bata dayon mangita sila og mga anghel o sponsors nga mutuman niini.

“Kung dili man ni mga wishes sa mga bata, at least malipay sila nga for a mean time, ang ilahang pagtrabaho nga masustinar ang ilang panginabuhi-an mao nga nasulod sila sa ilahang pagka child labor. So hinaot nga karong adlawa, magmalipayon ang mga bata, mahatagan og kahigayonan, maalibyohan ang inyong kahimtang nga even for this moment”, sulti ni Apugan.

Gawas sa Project Angel Tree, aduna pay ubang mga programa ang CLPEP nga naglakip sa Profiling of Child Laborers, Livelihood Assistance to Parents of Child Laborers, Sagip Batang Manggagawa, ug Advocacy Campaign.

Writer: Gwyn Kelly O. Lobitos

 

 

 

 

 

 

 

 

 

DavNor News

nainggo