NUMERO UNO nga suki sa KAwsa sa AGrikulturA ug PAnginabuhian sa barangaY (KAAGAPAY) ang mga empleyado sa DavNor Kapitolyo.

Mismo ang mga empleyado nga duol sa DNIPC Pasalubong Center, ang marketing arm sa KAAGAPAY, mao ang nag-unang pumapalit sa produktong gulay gikan sa mga mag-uuma. Gawas nga presko ug barato, makadaginot na og daghang oras ang mga empleyado sa ilang pag-adto sa palengke.

Dili lang mga trabahante ang suki sa KAAGAPAY gulay. Ang mga tag-iya’g karenderya nga duol sa DavNor Kapitolyo kanunay sab mamalit dihang ilang mahibaloan nga miabot na ang nangumpra nga KAAGAPAY buying team.

Kahinumduman nga gumikan sa mga lockdowns nga gipatuman tungod sa COVID-19 pandemic niadtong 2020, gilusad ni Gobernador Edwin “Kuya Gov” Jubahib ang KAAGAPAY pinaagi sa paghatag og libreng semilya ilabina ngadto sa gagmay’ng mag-uuma. Gawas nga dunay dugang income, tumong sab ni Kuya Gov ang “food-sufficiency” sa Davao del Norte pinaagi sa maong programa.

Gawas sa libreng semilya nga gipanghatag ni Gobernador Jubahib, gipakapin pa gyod ang libreng fertilizer ug alang sa pagpalit sa mga gulay, adtoon kini sa KAAGAPAY buying team aron dili na makagasto pa ang mga mag-uuma sa labor og pagbiyahe.

Gawas sa pagtanom og gulay, nanghatag na sab ang KAAGAPAY og mga piso sa manok aron padakoon sa mga mag-uuma nga paliton ra sab pagbalik dihang kini modagko na.

***************///