Wala kapugngi sa mga atleta sa 83 ka mga teams gikan sa lainlaing parte sa Probinsya ang ilang kasadya dihang pormal na gayud nga giablihan ang 2022 Governor’s Cup niadtong Abril 9, sa DavNor Gym.

Human sa pipila ka tuig nga gipugngan sa COVID-19 ang pagpahitabo sa dagkong mga liga, torneyo, ug uban pang klaseng panagtapok, ang 2022 Governor's Cup mao ang pinakaunang pagbalik sa unta tinuig nga kalihokan.

Isip representante ni Governor Edwin “Kuya Gov” I. Jubahib, gisaysay ni Board Member Engr. Franklin Gentiles nga ang nag-unang katuyoan sa Governor’s Cup mao ang pagpabalik sa kalagsik ug kabaskog sa kalawasan sa mga Dabaonon nga dugay nang natanggong sa ilang mga panimalay.

“Una, mao ang pagbalik sa kalagsik ug kapiskay sa atong kalawasan. Naa sa sports ang fountain of youth. Pirmi ta mahimong batan-on bisa’g tigulang na ta. Tungod sa COVID-19, dugay kitang igo nalang mututok sa mga basketball-an ug volleyball-an. Dugay kitang igo na lang mututok sa mga lainlaing mga sports… Mingaw na jud kaayo”, sulti sa Board Member.

Gipasalig ni Gentiles nga makanunayon ang suporta sa Probinsyal nga Panggamhanan nga gipangunahan ni Governor Jubahib pinaagi sa pagbutyag sa mga proyekto ug paningkamot sa Probinsya nga may kalabutan sa pagpalig-on sa isports sa Davao del Norte.

“Karon, ug sa umaabot nga katuigan, mas pakusgan pa nato ang sports, mas tagaan og dakong bili ug importansya… Gani, sa bag-o nga gym, Polyurethane na ang salog aron mas nindot ug luwas dulaan. Ang atoang Governor’s Oval, gisugdan na ang overall aron sa pipila ka bulan, bag-o na kini ug usa ka world-class nga dagananan. Ug labaw sa tanan, ubos sa mando ni Kuya Gov… gihimo nang libre ug walay bayad ang paggamit sa atong mga pasilidad diri sa Sports Complex para sa mga atleta, mga kabatan-onan, senior citizens, ug bisan kadtong mag-exercise lang aron mupiskay ang ilahang lawas”, saysay ni Gentiles.

Gani, gidayeg ni Shemar Jove H. Pormento, coach sa Tagum City Poblacion Volleyball Team, ang maong inisyatibo sa Probinsya ilabi na sab sa paglakip sa kategoryang LGBTQ+ sa volleyball tournament karong tuiga.

“Definitely a very remarkable decision ng- of course with our Governor Edwin Jubahib. Napakaganda ng kanyang programa in response to our gender and development. Kasi ganito⁠—this is kind of gender and development activities, kasi na-include yung LGBT Community. So, para sa akin, a big step para makilala talaga at no discrimination sa society, especially dito sa Davao del Norte… we are very happy talaga na at least kinilala not only the women, the straight guys, but of course they included the LGBT Community”, sulti ni Pormento.

Sa susamang adlaw sa Opening Program, gipahigayon ang unang tulo ka dula alang sa Basketball ug Volleyball, usa ka dula sa matag kategorya.

Apan giklaro ni Provincial Sports and Youth Development Officer Giovanni I. Gulanes nga ang Governor’s Cup karong tuiga dili lang limitado sa basketball ug volleyball, apan aduna usay ubang events sama sa football, softball, billiards, sepak takraw, tennis, table tennis, ug chess.

Ang mga dula alang sa 2022 Governor’s Cup ipahigayon matag Martes, Huwebes, ug Sabado, gawas sa Huwebes ug Sabado karong semanaha nga walay dula nga ipakahitabo tungod sa Semana Santa.

Writer: Gwyn Kelly O. Lobitos