Sa dili pa lamang dugay, giila ang Probinsya sa Davao del Norte isip Finalist sa 2021 Most Business-Friendly LGU (Provincial Level) ug Second Place Most Competitive Province (National Level), nga nahimong posible tungod sa hiniusang paningkamot ug kakugi sa nagkalain-laing buhatan ug empleyado sa Probinsyal nga Panggamhanan.

Subay niini, gipasidunggan pinaagi sa Gantimpala Agad Award (GAA) program sa Probinsya nga subay sa Program on Awards and Incentives for Service Excellence (PRAISE) sa Civil Service Commission (CSC) ang Provincial Governor’s Office, Provincial Administrator’s Office, Provincial Information, Communication and Knowledge Management Office, Provincial Planning And Development Office, Provincial Social Welfare and Development Office, Provincial Treasurer’s Office, Provincial Assessor’s Office, Provincial Health Office, Provincial Economic Enterprise and Development Office, Provincial Engineer’s Office, Provincial Veterinary Office, ug Provincial Agriculturist Office isip pag-ila sa ilang kolektibong paningkamot nga mitultol sa organisasyonal nga produktibidad sa Probinsya ingon man nasakmit niini ang nahisgotang mga pasidungog.

Midawat sab sa susamang award sila Humber Cabunoc (Dev’t Mgt Officer IV, CIDD), Gloria Excelsa Pamugas (Dev’t Mgt Officer IV, EWDD), Noel Baguio (Supervising Admin Officer, PICKMO), Joevynar M. Miedes (DMO III/LEIPO Designate, DNIPC), Meriam D. Bolipata (DMO II, DNIPC), Jayzaldy B. Banjal (Admin Aide I, DNIPC), Roel Eduard T. Camus (Computer Programmer I, DNIPC) ug Joraiza R. Amihan (Admin Aide I, DNIPC).

Matod ni Assistant Provincial Administrator for Operations Engr. Maria Hazel C. Zafra, dako ang gikatampo niini nga mga buhatan ug indibidwal sa kalamposan sa Davao del Norte isip Most Business-Friendly ug Most Competitive Province ilabi na sa pag-prepara sa Bid Books, pagkolekta sa impormasyon, ug pag-andam ug pagsumite sa mga enabling documents.

“We are here to receive our recognition because this is a way of the management gikan kang Kuya Gov Edwin Jubahib nga hatagan og recognition as a way of gratitude and recognition to those of you who has supported para mu-lead ta ani nga distinction—distinction sa province. Very remarkable distinction”, sulti ni Zafra.

Sa laing bahin, gitunolan sab og Gantimpala Agad Award sila Gabriel F. Mayes (Prison Guard II), Alfredo P. Manlimos (Prison Guard I), ug Irish R. Daroy (Admin Aide I) sa Provincial Administrator's Office - Provincial Rehabilitation Center (PADO-PRC) tungod sa ilang dedikasyon ug pagkamaunongon sa serbisyo publiko dihang ilang na-detect, na-confiscate, ug na-intercept ang ilegal nga mga transaksyon sa droga (Metamphamine Hydrochloride/Shabu) sa Davao del Norte Provincial Rehabilitation Center (DPRC).

Mipaabot sa iyang pasalamat si DRPC Prison Guard I Alfredo P. Manlimos ngadto sa Probinsyal nga Panggamhanan nga gipangunahan ni Governor Edwin “Kuya Gov” I. Jubahib alang sa pag-ila sa ilang mga paningkamot sa pagpugong sa drug abuse, violence, ug commission of crimes sulod sa Provincial Rehabilitation Center.

“Amo gyu’ng gibuhat ang tanan ma’am aron lang gyud nga di’ jud makalusot ang mga droga or something nga mga contraband diha sa sulod sa prisohan ma’am. Among gina-secure ma’am kay syempre sa amoa nga part, mas nindot man gyud nang zero contraband gyud ta sa sulod sa prisohan… Dako kaayo akong pasalamat kang Kuya Gov ma’am kay sukad sukad ma’am, karon lang gyud mi ka-receive ingon ani nga award. Mao nang dako kaayong pasalamat kang Kuya Gov”, pahayag ni Manlimos.

Gawas sa GAA, gibutyag ni Provincial Human Resource and Management Office (PHRMO) Head Edwin A. Palero nga daghan pang nagkadaiyang awards alang sa mga empleyado ang giandam sa PHRMO ubos sa mandato ni Kuya Gov sama sa mga awards based on records, Masinop Award, ug sa bag-ohay lang na-meetingan nga Employee of the Year Award samtang padayon nga ginaprayorita sa Probinsya ang pag-ila sa kakugi ug dedikasyon sa mga takos nga empleyado.

Writer: Gwyn Kelly O. Lobitos

 

 

 

DavNor News

nainggo