Sa tinguha nga mahatagan og episyente, kasaligan, ug malungtarong serbisyo sa irigasyon ang mga mag-uuma nga nagsalig lamang sa ulan, giinagurahan na sa National Irrigation Administration (NIA) Region XI ang nagkantidad P622 million nga Upper Saug River Irrigation Project (US-RIP) sa Barangay Cabidianan, New Corella, Davao del Norte.

Gipangulohan ni NIA Administrator Ricardo R. Visaya, uban ni Deputy Administrator for Administrative and Finance Sector Ralph Lauren A. Du ang gipahigayong soft inauguration sa maong proyekto sa irigasyon nga naglakip sa pagpatukod og diversion dam ug mga irrigation facilities, project facility, supplemental drainage, road system, ug mga slope protection works.

Sukad Pebrero ning tuiga, 86.79% na ang nakumpleto sa Upper Saug River Irrigation Project.

Gipasabot ni Davao del Norte Irrigation Management Office (IMO) Division Manager Larry C. Franada nga bisan og parsyal pa lamang ang inagurasyon, ang inisyal nga nahumang mga estraktura makaserbisyo na sa 407 ektarya nga adunay 141 ka mag-uumang benepisyaryo nga nahisakop sa San Roque, Sto. Niño, Suawon, Limbaan Irrigators Association (SARONISULIA), Inc.

Gisaysay sab ni NIA Administrator Visaya nga isip usa ka big-ticket project, ang pagpondo ug pagpatuman sa Upper Saug RIP mikabat og daghang katuigan: 2016 ngadto sa 2018, 2020, ug 2022, samtang gipahayag niini ang kalipay nga natuman na gayud ang maong proyekto human sa pila ka tuig.

"It is a soft inauguration in the sense na pwede ng gamitin, at itutuloy natin ito hanggang end of this year para ang lahat ng service area nito ay mapapatubigan na", sulti ni Visaya.

Gisugdan pagtukod niadtong 2016 ug gikatakdang mahuman sa Disyembre 2022, ang proyekto gilauman nga makapatubig sa 980 ka ektarya ug makabenepisyo sa 310 ka mag-uuma kon mahuman na kini.

Samtang gipasalamatan ni Regional Manager Jimmy L. Apostol ang Nasudnong Panggamhanan pinaagi ni Presidente Rodrigo R. Duterte nga midalit sab og pre-recorded video message, ang Probinsyal nga Panggamhanan nga gipangunahan ni Governor Edwin I. Jubahib, ang lain-laing buhatan sa municipal ug barangay Local Government Units (LGUs), ug bisan pa man ang mga Lumad sa mga tribong Manguangan ug Dibabawon alang sa ilang suporta sa pagpatuman sa Upper Saug RIP.

Writer: Gwyn Kelly O. Lobitos

#OneDavNorOneTeam
#DavaodelNorte

 

 

 

DavNor News

nainggo