ALANG SA MGA KUGIHAN, ang food-sufficiency program ni Gobernador Edwin “Kuya Gov” Jubahib nga KAwsa sa AGrikulturA ug PAnginabuhian sa barangaY kun KAAGAPAY nakatukmod kanila nga dugang magkugi para sa kaayohan sa ilang kaugalingon ug pamilya.

Usa ang pamilya ni Hermenigildo “Gil” Venoza nga taga Purok 5 New Camiling, Carmen, Davao del Norte nga nag-gulayan na niadtong 2017 apan dugang nagkugi sa pagtanom og gulay tungod sa KAAGAPAY.

“Maoy nagtukmod sa akoa nga mag-gulay na pod ning KAAGAPAY. . Ning-abot ang KAAGAPAY ningsamot nga nagkugi ko naa na ma’y semilya nga panghatag. . Dako kaayo’g kausaban kay di naman ta mamalit og semilya. Basta membro ka pwede naman ka tagaan ni Sir Payot og semilya. Ka-dugang-dugang na, unya bawas gastos pod kay mahal baya kaayong semilya. . Naay kalabasa suprema, batong, paliya,” saysay ni Gil sa tabang nga nadawat gikan sa KAAGAPAY pinaagi kang Randy Payot, ang na-asayn nga staff sa lungsod sa Carmen.

Katimbang ang tibuok pamilya gihimong gulayan ni Gil ang mga daplin sa karsada ug sa 3/4 ektarya nga basak nga dunay banabanang gidak-on 1,000 square meters. Ang matag adlaw’ng halin sa gulay dako kaayo’g tabang sa adlaw-adlaw nga allowance sa iyang mga estudyante.

“Ayy nakapa-eskwela ko sa akong anak, nakapahuman ko’g college, agriculture diha sa USEP, Mabini, unya naa pod ko’y gamay’ng nakuhang motor, kini. Nakadugang-dugang pod ni sa kita sa gulay,” dugang ni Gil nga nagpakita sa 2018 model Aerox nga motorsiklo.

Gumikan sa daghang lockdowns nga gipatuman tungod sa COVID-19 pandemic, gilusad ni Kuya Gov ang KAAGAPAY aron mapugngan ang kanihit sa pagkaon pinaagi sa paghatag og libreng mga semilya sa gulay ug mga manok sa “growership” nga pamaagi.

“Dako kaayo’g tabang. Ngano man? Mao lagi na kung naa kay gulay ila mang paliton, sila ma’y magkuha sa imong gulay, wa na’y problema. Unya sa presyo mao pod sa gawas mao pod sa KAAGAPAY. Salamat kaayo sa gihatag nga pribilehiyo sa amoa, kang Gov, sa inyoha, sa amoang BEW Sir Randy, tanan,” todo-pasalamat ni Gil Venoza uban sa hangyo nga unta ipadayon sa KAAGAPAY ang paghatag kanila sa libreng mga seeds ug abono.

“Unta seeds ug abono kay perte gyong mahala ang abono ron, isa gyod na. . . Kadtong naay mga luna diha nga bakante, pwede ninyo na tanoman bisan daplin-daplin sa karsada pwede na tamnan basta mahinloan. Tanomi ninyo kay sayang ang paghago; sigeng hinlo walay tanom, wala lang gihapon. Mag-KAAGAPAY ta. Kung dunay itanom dunay anihon; kung magkugi naay maani,” panawagan ni Gil Venoza sa kaubang mag-uuma.

Gumikan sa KAAGAPAY semilya daghang mag-uuma nga bisan wala madato apan nakapalit og motorsiklo, nakapatukod og balay, nakapalit pwesto sa palengke ug ilabina ang pagpaeskuyla sa ilang mga anak.

*************************///