LABIHANG LIPAYA sa anak nga gipalitan og bag-ong “Raider” motorsiklo sa iyang amahan gikan sa halin sa KAAGAPAY gulay.

Katabang sa iyang Papa sa pag-gulayan, matod ni Jake Manlangit, kamanghorang anak ni Antonio Manlangit sa Purok 6B Magsaysay, Carmen nga proud ug mapasalamaton kaayo siya sa iyang amahan labina sa KAAGAPAY nga maoy tighatag og semilya.

“Dakong pasalamat sa akong Papa kay tungod sa iyang kakugi paggulayan naabot ning motora nga gipalit (para) sa akoa ug nagatabang pod ko. . proud nga mang-gugulay kay tungod sa gulay naay ing-ani nga motor ug panginabuhi. Daghan kaayong salamat sa akong Papa ug sa KAAGAPAY, kay Gov ug sa inyong tanan. Daghan kaayong salamat sa gihatag nga semilya,” matod sa batan-ong Jake nga nagsakay sa bag-ong Raider 155cc.

Ang amahan nga si Antonio Manlangit mag-20 anyos nang tigtanom og gulay apan magduha pa lang ka tuig nga membro sa KAwsa sa AGrikulturA ug PAnginabuhian sa barangaY kun KAAGAPAY, ang food-sufficiency program ni Gobernador Edwin “Kuya Gov” Jubahib nga gilusad gumikan sa pagsige’g lockdowns tungod sa COVID-19.

“Karon nga naka-pamembro ko sa KAAGAPAY daghan gihatag nila nga benepisyo sama sa semilya. Kuan pod kung maglisod mi pagbaligya sa amoang abot, duna pod ang KAAGAPAY modawat sa amoang produkto. . Kanang akong mga napundar gumikan na sa akong paningkamot sa gulay. Wala ko’y laing tarbaho, mao ra gyod na. Nakapundar ko’g balay, nakapalit ko’g tulo ka motor. Motor-motor lang pod kay mao ra ma’y makaya,” saysay ni Antonio.

Iyang gipatin-aw nganong napalit nila nga cash ang P109,000 kantidad nga Raider.

“Kadtong nangaging mga bulan nga nakaigo sa maayong presyo ang Pepino; ang pinakataas namo 38 (pesos/kilo) unya 30 ang pinaka-baba. . Mo-harvest ko’g tag 700 (kilos) kada adlaw unya sulod sa two weeks,” pasabot sa KAAGAPAY membro sa Purok 6B Magsaysay, Carmen.

Hilabihan ang pasalamat sa pamilyang Manlangit.

“Ayy dako kaayong nakatabang sa akoa, nalipay kaayo ko. . Dako kaayo ko’g pasalamat sa probinsyal labina kang Governor ug kang Sir Payot nga maoy tulay namo dire sa area, nga dili mi ma-ing-ani kung wala siya. . Kung magkugi ka naa gyod ka’y mapaabot, kung mananom naa gyod kay maani,” pasalamat ni Antonio kang Kuya Gov ug sa iyahang programang KAAGAPAY.

Giawhag sab ni Antonio ang ubang mag-uuma nga mag-gulayan ingong alternatibong kakuhaan og income.

“Akong giawhag kadtong wala pa nakahibalo nga dapat duna sila’y alternative nga income kay kung magsalig lang ta sa isa ka tanom wala ta’y mapaabot kay kada adlaw duna ta’y gigastohan. Ang gulay kung naa lang kay pasunod nga tanom di gyod ka mawad-ag kwarta kay duna man kay ikabaligya. Bisag barato na’g mahal makatabang gyod na.”

Ang gitikad nga gulayan sa mga Manlangit wala pa'y one-fourth hectare.

********************///

Manggugulay Antonio Manlangit didto sa iyang umahan. 

Si Antonio kauban si Randy Payot ang tulay sa KAAGAPAY ngadto sa kaumahan 

Taliwala sa pepinohan 

Nagkumbabit ang mga paliya. 

 

DavNor News

nainggo