GIKALIPAY pag-ayo sa daghang benepisyaryo ang pag-apil sa pagbuhi’g isda sa KAwsa sa AGrikulturA ug PAnginabuhian sa barangaY kun KAAGAPAY nga programa.

Gigahinan og P1,000,000 pesos inisyal nga pondo sa probinsyal nga panggamhanan ni Gobernador Edwin “Kuya Gov” Jubahib aron ipalit og tilapia fingerlings ingon man pagkaon sa mga isda nga padagkoon sa unang batch 380 ka mga benepisyaryo.

Kahinumduman nga gumikan sa COVID-19 niadtong 2020 gilusad ni Kuya Gov ang food-sufficiency program nga KAAGAPAY aron matabangan ilabina ang mga gagmay’ng mag-uuma nga masagubang ang kalisod gumikan sa sigeng lockdown tungod sa pandemya.

Giawhag ug gilusad dayon niadtong Hunyo 2020 ang pagpananom og gulayon bisan diha lang sa tugkaran. Gipanghatag libre ang mga semilya ug abono aron dunay makuhaan para sa pagkaon samtang pwede sab ibaligya ang sobrang produkto nga palito’g balik sa KAAGAPAY. Aron madugangan ang income, gisunod ang proyekto sa pagpadagko’g manok (Free Range Chicken

growership) nga ang KAAGAPAY ra sab ang magpalit human sa 60 ka adlaw nga pag-atiman.

Samtang gisunod ang gobyernong proseso sa pagpatungha sa mga gikinahanglan sa Inland Fish Production, naglaom si DavNor Provincial Agriculturists Office Senior Aquaculturist Clori Silvosa nga sa dili madugay moabot na ang mga fingerlings aron maapod-apod dayon ngadto sa mga benepisyaryo.

Gawas sa tilapia, gipahimutang na sab ang plano alang sa “Hito” production aron duna gyod madugang income sa mga mag-uuma.

Gibutyag sab ni Silvosa nga ang probinsyal nga panggamhanan ni Kuya Gov aduna na’y napili nga lugar didto sa Kapalong alang sa Provincial Fish Hatchery Production Center sa tilapia ug hito.

Adunay pagahimoon nga fishpond inspection and evaluation sa 380 ka benepisyaryo gikan sa Tagum. Asuncion, New Corella, San Isidro, Kapalong, Talaingod, Sto. Tomas, Braulio E. Dujali, Carmen ug Panabo City una pa ihatag ang mga fingerlings ug feeds sa isda.

Ang ubang benepisyaryo sa Gulay Production ug Free Range Chicken Raising sa Carmen, Braulio E. Dujali, Kapalong ug New Corella nga dunay mahimong fishpond nagpakita dayon sa mga KAAGAPAY staff aron mapailawom sa inspection ug evaluation.

Ang mga KAAGAPAY staff kun Agricultural Extension Workers (AEWs) ipailawom sab sa mga pagbansay sa Good Aquacultural Practices (GAqP) diin sila ang magsilbing “tulay” sa KAAGAPAY ug mga benepisyaryo.

*****************///

 

 

 

DavNor News

nainggo