Pag-abri sa mga bag-ong kadalanan ug panginabuhian ang hataga’g dakong prayoridad ni Mayor Jonnie A. Libayao sa lungsod sa Talaingod, Davao del Norte. Kini ang iyang nahimong pahayag sa gipahigayong press conference atol sa opening ceremony sa 31st Araw ng Talaingod niadtong Hulyo 25, 2022.

Sumala sa mayor nga iyang ablihan ang kadalanan sa mga sitio aron mas dali ang paghatud sa serbisyong medikal ug panginabuhian ngadto sa iyang mga ginsakopan aron malikayan sa mga katawhan nga magpadala ug malingla sa rebeldeng kalihokan.

Nagpaabot si Libayao sa iyang dakong pasalamat kang Gobernador Edwin “Kuya Gov” Jubahib, gumikan sa makanunayong suporta kaniya sa iyang administrasyon, ilabi na sa naangkon niining kalampusan sa pagwagtang sa insurhensiya sa maong lungsod, hinungdan nga natagamtaman nila karon ang kalinaw nga maoy mahimong susi sa ilang kalamboan.

Gisaysay ni Municipal Administrator Clifford Libayao, nga sobra 30 na ka mga sitio ang ilang nahimoan og kalsada, gikan sa paglingkod sa iyang amahan. Natagamtaman na sa mga katawhan nga kanhing giabuso sa mga rebelde ang serbisyo sa gobyerno.

Atol usab sa maong selebrasyon, gi-inagurahan ang Pasalubong Center nga nahimutang sa bag-ong bus terminal sa Talaingod. Gilaumang maghatag kini’g dugang mga kahigayonan sa panginabuhian alang sa mga Ata-Manobo ug modaghan ang patigayon sa mga IP-made handicrafts.

Mismong si Mayor Libayao ang nanguna sa ribbon cutting inubanan ni Department of Trade and Industry Provincial Director Romeo Castañaga ug uban pang mga opisyales sa maong LGU.

Writer: Nestor Mata, Jr.