16 ka mga Talaingodian beauties ang mibida sa milabay’ng Binibining Talaingod 2022 niadtong Hulyo 28, nga gipahigayon sa bag-ong terminal sa lungsod atol sa selebrasyon sa ika-31 Araw ng Talaingod.

Gidagsa dili lamang sa mga katawhan sa Talaingod apan lakip sab sa nagkadaiyang bisita sa nagkalain-laing lugar ang pagbalik sa pinakaprestehiyosong beauty pageant sa lungsod human sa duha (2) ka tuig kining nahunong tungod sa pandemya.

Pinasahi ang bersiyon sa maong beauty pageant karong tuiga tungod kay dili lamang ang kaanyag ang gipasundayag sa mga kandidata, apan ilabi na ang ilang mga nagkadaiyang mga adbokasiya nga nagtumong sa pagdala og kabag-ohan sa lungsod.

Gawas niini, mas gipahugyaw usab ang coronation night gumikan sa espesyal nga pasundayag sa usa ka bisitang hurado nga si Jaime Onod o mas nailhan sa pangalang “Telma”, usa ka bisaya content creator nga adunay daghang followers ug viewers sa facebook ug youtube.

Human sa init nga kompetisyon ilabi na sa production number, casual, playsuit, evening gown, ug preliminary Q&A, picture analysis, gideklarang top 7 finalists sila Angelica Lagar Orosio, Caryl Kyzah Saguing Bravo, Nerrah Rosas, Hyacinth Claire Barcelona Manlapaz, Kristina Cassandra Planto, Jirah Faith Saylo, ug Jeska Donado Aljas.

Sa final question and answer portion, diin ang top 3 candidates mitubag sa susamang pangutana, gideklarang 2nd Runner Up si Jirah Faith Saylo, 1st Runner si Nerrah Rosas, ug mitumaw nga madaugon isip Binibining Talaingod 2022 si Hyacinth Claire Barcelona Manlapaz, kinsa nagrepresenta sa Barangay Sto. Niño.

Mapasalamaton si Mayor Onit Libayao sa tanang tao nga nahimong kabahin sa kalampusan sa 31st Araw ng Talaingod, labi na sa way puas nga suporta ni Davao del Norte Gobernador Edwin “Kuya Gov” Jubahib sa lungsod sa Talaingod.

Writer: Ejay Capoy
Photo Credits: Val Canque