Liboan ka mga kabataan mipailom sa qualifying examination alang sa pagsungkit sa Provincial Scholarship Program ni Governor Edwin I. Jubahib. Ang online examination nga gipahigayon niadtong Hulyo 26, 28, Agusto 2, 4 ug 5, 2022 adunay managlahing venue sa pag-exam ngadto sa nagkadaiyang mga lokalidad.

Gibutyag ni Development Management Officer IV ug PADO-EWWD Division Head Gloria Excelsa S. Pamugas, MSSW, nga nakarehistro sila online kapin 4,000 ka mga estudyante ug 2,000 kapin niini ang mi-exam na.

Sumala usab ni Pamugas nga ang mga palaran nga mopasar adunay P6,000 matag semester nga madawat isip educational assistance hangtod nga sila motapos sa ilang kurso. Gipasalamatan usab niya si Governor Jubahib sa suporta sa maong programa. Kahibaloan nga nagpadayag nang daan ang gobernador sa hugtanong pagtutok niini sa natad sa edukasyon.

“Nagpasalamat kaayo ta’g dako kang Kuya Gov. Edwin Jubahib sa iyang makakunayon nga suporta sa maong programa. Sumala sa iyang gisulti sa iyang SOPA nga mohatag siya og educational assistance worth P6,000 per semester sa mo-qualified nga estudyante,”dugang pahayag ni Pamugas.

Samtang sagol kulba ug hinam ang gibati sa magtutungha nga si Johana Marie Rodela, taga-Visayan Village, Tagum City uban sa paglaom nga siya mopasar.

“Expectation nako ani nga makapasar ug maka-help ‘ni nga scholarship sa akong pag-eskwela po,”paninguha ni Rodela.

Writer: Lorna Tripoli