Malampuson ang gipahigayong Micro, Small and Medium Enterprises (MSME) Night sa Big 8 Corporate Hotel, Tagum City, niadtong adlawng Sabado, Hulyo 29 isip kabahin sa MSME Week 2022 nga gisugdan niadtong Hulyo 27 sa pagpanguna sa Department of Trade and Industry - Davao del Norte.

Gitambongan kini sa gatusan ka mga gagmayng negosyante nga nigradwar sa Kapatid Mentor Me Project (KMME) gisugdan niadtong 2017 hangtud migraduate karong tuiga.

Ang KMME Project, usa ka inisyatibo sa DTI ug sa Philippine Center for Entrepreneurship aron matabangan ang mga MSME sa nasud pinaagi sa coaching and mentoring sa mga dagkong kompanya.

Sentro sa maong selebrasyon ang paghatag og award ngadto sa pinili nga mga negosyante nga nagpakita og katakos sa ilang pagnegosyo. Nakuha ni Cheryl Balon, tag-iya sa Balon’s Litson ang Most Outstanding MSME Micro Category ug ni Ralna Mae Macasa, tag-iya sa KC’s Cups and Confection, ang Most Outstanding MSME Small Category.

Nagpaabot sa iyang pasalamat si Macasa, ngadto sa DTI gumikan sa paggiya kaniya aron magmalampuson sa iyang gisudlang negosyo. Bisan pa man sa mga pagsulay ug hagit dala sa covid-19 pandemic, nagapadayon gihapon siya sa iyang negosyo. Giawhag sab niya ang mga susama niyang negosyante sa pagsalig sa ilang kaugalingon aron makab-ot sab nila ang ilang gipangandoy nga kalamboan.

“Sa mga sama nakong negosyante noh, not at all times gyud nga happy daghan gyud ug mga downside sa business pero ako lang ikatambag continue lang gyud even if nobody else would believe in you, believe in yourself and in your goal and in the end makamit ra dyud nimo ang tabang sa ginoo,”padasig sa negosyante.

Nagpaambit sa ilang mga kasinatian sa pagnegosyo ang pipila ka mga negosyante labi na si Engr. Aerol Conde ang kasamtangang Presidente sa Tagum City Chamber of Commerce ug owner/proprietor sa Perfect Milling Corporation. Iyang gipahinumdoman ang mga kaubanang negosyante sa ka-importante sa accounting ug disiplina sa pagdala sa kwarta aron molungtad ang negosyo.

“So kung mag negosyo ta ayaw gyud ninyo kalimti ang accounting, kay most important thing nga inyong buhaton sa inyong negosyo, is you know accounting. Believe in yourself, tuohan nato ang atong kaugalingon. Ang importante discipline in you, tama man to mosuroy ta pero kailangan ang discipline how to handle your money, ang pinakaimportante sa tanan ang disiplina nato, kay kung wala kay disiplina sa pag-handle og kwarta mawala ra ‘na,”tambag gikan ni Conde.

Giawhag ni Nenita Malbas, ang Vice Chairperson sa Davao del Norte Provincial Micro, Small and Medium Enterprise Development (PMSMED) Council, ang mga negosyante nga mogamit sa digital technology aron nga mas molambo pa ang ilang negosyo.

“This time we should be innovative and be updated with digital technology. A growing digital economy in Davao del Norte and of course in Davao Region will definitely make our businesses more resilient and sustainable,”pagkabig sa vice chairman.

Suportado ni Governor Edwin “Kuya Gov” Jubahib ang tanang mga programa sa DTI nga nag promotar sa pagpalambo sa negosyo ug panginabuhian. Kalakip sab ang paghata’g pagtagad sa mga gagmayng negosyante, aron makabangon ug mobalik paglagsik ang eknomiya sa probinsya. Hinungdan nga sa iyang ikaduhang termino isip Gobernador, iyang mas gipalapdan ang KUYA GOB NG MASA Development Agenda.

Writer: Nestor H. Mata, Jr.
Photo credits: DTI Davao del Norte

 

 

 

DavNor News