Nanumpa si Kuya Gov. Edwin I. Jubahib isip Chairperson sa League of Provinces of the Philippines (LPP) sa Region XI sa gipahigayon nga oathtaking ceremony sa Malacañang.

Mismo si Pangulong Ferdinand "Bongbong" Marcos Jr. ang nangulo sa pagpanumpa sa mga bag-ong miyembro sa National Executive Board (NEB) ug mga opisyales sa liga sa mga gobernador.

Sa iyang pakigpulong kanila, giawhag sa presidente ang mga gobernador nga palig-onon ang koordinasiyon sa mga local government units (LGUs) sa nasyonal nga panggamhanan aron ipaniguro ang seguridad sa pagkaon ug alang sa paglambo sa mga probinsiya.

Kauban nga mitambong ug mipadangat sa ilang pahalipay sila Special Assistant to the President Antonio Lagdameo, Jr., nga kanhi Congressman sa ikaduhang distrito sa Davao del Norte ug si Secretary Benjamin Abalos sa Department of Interior and Local Givernment (DILG).

Isip pag-ila sa iyang katakus, gipili sa mga kaubanang gobernador si Kuya Gov nga Regional Chairperson, atul sa gipahigayon nga 1st General Assembly & Election of Officers sa LPP sa milabay nga bulan.

Usa kini ka dakong kahigayonan aron mapaambit sa Davao del Norte ang mga 'best practices' niini ngadto sa ubang mga probinsiya, uban sa pagpaniguro ni Kuya Gov nga dili mabiyaan ang mga probinsiya sa Davao Region ilawom sa iyang liderato.

Nahimong bag-ong presidente sa liga sa mga gobernador si South Cotabato Governor Reynaldo Tamayo, Jr., samtang National Chairman si Quirino Governor Dakila Carlo Cua.

Kauban usab sa mga mitambong nga mga opisyales sila Davao de Oro Governor Dorothy Gonzaga ug Davao Oriental Governor Corazon Malanyaon.