Gipaniguro ni Davao del Norte Governor Edwin “Kuya Gov” I. Jubahib ang iyang bug-os nga suporta sa administrasyon ni Pangulong Ferdinand “Bongbong” Marcos, Jr. ug Vice President “Inday” Sara Duterte.

Human mapili isip chairperson sa League of Provinces of the Philippines (LPP) sa Davao Region, subling gipasalig sa gobernador ang iyang hugtanon nga pagtabang sa mga programa ug prayoridad sa presidente, aron sa mas lapad ug inklusibo nga pagbangon ug kalamboan sa nasud.

“Maningkamot ako kutob sa akong makaya sa pagtabang sa administrasyon ni Pangulong Ferdinand “Bongbong Marcos, Jr., ug Vice President “Inday” Sara Duterte, kuyog sa akong mga kauban nga gobernador sa Davao Region, ug sa tabang sa atong mga katawhan,” maoy pasalig ni Kuya Gov.

Gipangunahan mismo ni PBBM ang pagpanumpa ni Kuya Gov. isip chairperson sa liga sa mga gobernador sa Rehiyon XI, uban sa mga bag-ong miyembro sa LPP National Executive Board (NEB) ug mga opisyales sa liga, sa gipahigayon nga oathtaking ceremony sa Malacañang.

Paghuman sa seremonyas, gikalipay kaayo ni Kuya Gov ang pagduol kaniya ni Special Assistant to the President Antonio Lagdameo, Jr. aron mopadangat sa iyang pagtimbaya ug pahalipay. Si Lagdameo misilbi isip congressman sa ikaduhang distrito sa Davao del Norte sa tulo ka termino gikan tuig 2007 hangtud 2016.

Gipaniguro sa gobernador ang positibong pagtuman sa mga opisyales sa Davao Region sa panawagan sa presidente aron sa pagpalig-on sa koordinasiyon sa mga local government units (LGUs) ug sa nasyonal nga panggamhanan sa pagpaniguro sa seguridad sa pagkaon ug pagpalambo sa ekonomiya.

Gipasalamatan ni Kuya Gov ang pagtutok karon sa administrasyon ni PBBM sa agrikultura, panlawas, peace and order ug uban pang prayoridad nga milangkob sa “10-point agenda for economic renewal and long-term growth” sa presidente.

Butyag sa gobernador nga nahisubay sa maong mga programa sa presidente ang estratehiya sa probinsiya sa Davao del Norte sa iyang ika-duhang termino, nga mao ang KUYA GOB NG MASA development agenda.

 

DavNor News