Gibatbat ni Governor Edwin “Kuya Gov” I. Jubahib ang kamahinungdanon sa pag-antos ug pag-agwanta, sa paglahutay hangtud sa katapusan, ug sa hugot nga pagtuo sa Guinoo aron mulampos sa kinabuhi.

Kini ang mga hiyas nga gitagaa’g gibug-aton sa gobernador diha sa iyang pagdasig sa mga minggradwar, atul sa 3rd Commencement Exercises sa Davao del Norte Learning Institute (DNLI) kagahapong adlawa.

Upat ang mipaso nga nakahuman sa Master in Public Administration (MPA), 16 ang migradwar sa Bachelor in Public Administration (BPA), 18 sa Bachelor of Science in Entrepreneurship (BS-Entrep) ug 33 ang nakahuman sa Bachelor of Science in Disaster Resiliency and Management (BSDRM).

Gisaysay ni Kuya Gov, kinsa gikan sa mapaubsanon nga sinugdanan, ang dakong milagro sa paglahutay, kakugi ug pagtuo mao nga nalatas niya ang kalisod ug daghang mga hagit aron maabot ang iyang nahimutangan karon.

“Let my life story become a living testament of how patience, perseverance, and faith in God can transform even the most ordinary person to someone of extraordinary reputation (Ang akong kinabuhi usa ka buhing testamento nga ang pag-antos, paglahutay ug pagtuo sa Guinoo makakabag-o sa kahimtang sa usa ka ordinaryong tawo aron makabaton og talagsaong dungog),” sulti niya.

Kay gikan sa kabus nga pamilya sa mag-uuma, butyag sa gobernador nga wala nahimong babag ang kapobrehon sa pagkab-ot sa iyang mga damgo, sanglit mitrabaho siya isip conductor sa bus samtang nagtiwas sa college.

I am thankful that God taught me those lessons the hard way because I become strong, values-oriented and have developed a passionate heart for the lost, the least and the last in our society (Mapasalamaton ako sa Guinoo sa mahinugdanong pagtulun-an nga maoy nakahimo kanako nga lig-on, nagtutok sa mga mithi, ug dunay kasingkasing alang sa mga kabus ug timawa sa atong katilingban),” ingon ni Kuya Gov.

Ang DNLI usa ka institusyon nga gimugna sa Probinsyal nga Panggamhanan sa Davao del Norte nga nagahatag og higayon sa mga opisyal ug empleyado sa mga lokal nga panggamhanan, gikan probinsiya, munisipyo ug hangtod sa mga barangay aron makatiwas sa kolehiyo ug masteral.

Sa pakig-alayon sa Davao del Norte State College (DNSC), duna nay unom ka mga nakahuman sa master's program ug kapin 350 sa bachelor's ug certificate programs.

“…become a beacon of hope to your society… illuminate the dark corners of the world, and always aspire to become catalysts of genuine change (… dasigon ko kamo aron mahimong kahayag sa paglaum sa katilingban… idan-ag ang kangitngit sa kalibutan, ug sa kanunay tinguhaa nga mahimong katalista sa tinuod nga kabag-ohan),” maoy pagtapos sa mensahe ni Kuya Gov.

 

 

 

 

 

DavNor News

nainggo