Nagbunga ang gipakusgang kampanya ni Governor Edwin “Kuya Gov” I. Jubahib alang pagpabakuna batok sa Coronavirus Disease (COVID-19), kay nagpadayon ang Davao del Norte sa dunay pinakataas nga vaccination rate sa entiro Davao Region.
Hangtud Agosto 17, 2022, duna nay 621,902 ka mga Dabaonon ang fully-vaccinated, kon nakakumpleto na sa duha ka dose sa vaccine.
Katumbas kini sa 83.2 percent sa gitarget nga 70 percent sa populasyon aron mabakunahan.
Nanguna gihapon ang probinsiya sa paghatag sa booster shots, diin 100,602 na ang nahatagan og booster dose, hinungdan nga nakab-ot niini ang kinatibuk-ang 24.8 percent sa target population.
Ang gipakusgan nga kampanya sa probinsiya agi’g suporta sa Pinaslakas campaign sa gobyerno ni Pangulong Ferdinan “Bongbong” Marcos, Jr., aron pakusgan ang booster coverage ug makab-ot ang herd immunity, kon panon nga resitensiya sa mga Pilipino.
Sa pagtuman niini, gipaduol karon sa probinsiya ang mga vaccination sites ngadto sa tugkaran sa katawhan.
Butyag ni Neidel Feah Ferido, ang National Immunization Program Coordinator sa probinsya, nga ning bulan sa Agosto 2022 sugod nang gipahigayon sa Provincial Health Office (PHO) ang mass vaccination drive ngadto sa mga barangay ug mga eskwelahan.
Gawas pa kini sa regular nga skedyul sa vaccination site sa probinsiya nga diha nahimutang sa Davao del Norte Sports and Tourism Complex, samtang nagapahigayon sab sa ilang kaugalingong vaccination sites ang nagkadaiyang mga local government units (LGUs).
Sulti ni Ferido nga moabot sa upat ka beses sa usa ka semana sila moadto sa mga barangay ug eskwelahan alang sa pagpahigayon sa pagbakuna. Kini depende, matod niya, sa request sa barangay ug eskwelahan, ug kung anaa ang doctor sa probinsya.
Karong adlawa, dul-an sa 200 ka mga indibidwal ang ilang nabakunahan sa La Filipina Elementary School, Tagum City.
“Abli ang atong buhatan sa pagtubag sa hangyo sa mga barangay, eskwelahan, ug mga establisimento aron magpahigayon kita og vaccination drive sa ilang lugar. Daghan kita’g bakuna ug walay rason nga magduha-duha pa sa pagpabakuna ang katawhan,” maoy gipahingusgan ni Ferido.
Dugang butyag niya nga nagbunga sab ang ilang pakig-alayon sa federasyon sa mga senior citizens sa tanang LGUs, aron mas modaghan ang mga katigulangan nga magpabakuna.
Hangtud niini nga semana, dunay kapin 1,500 na ka mga tigulang gikan sa nagkalainlaing LGUs ang dugang nga nabakunahan.
