Gipahigayon ang opening sa usa ka bulan nga 2022 Sportsfest Activity sa mga empleyado sa DOLE- Region XI sa Davao del Norte Sports and Tourism Complex niadtong Agosto 12, 2022.
Dul-an 200 ka mga personahe sa Department of Labor & Employment ang misalmot gikan sa mga field offices niini sa probinsya sa Davao del Sur, Davao Occidental, Davao Oriental, Davao de Oro, Davao City ug Davao del Norte.
Gibutyag ni Atty. Jason P. Balais, Assistant Regional Director sa DOLE-XI, nga ila kining gihimo agi’g pagsaulog sa Civil Service Month sa bulan Setyembre. Iyang gipasalamatan si Gobernor Edwin “Kuya Gov” Jubahib sa pagtugot nga magamit ang sports facilities sa probinsya alang sa unang adlaw nga kalihokan ug matud pa ilang ipadayon sa ubang probinsya.
"First and foremost, salamat kaayo kang Kuya Gov Edwin Jubahib for accepting and allowing us to be use the facilities of Davao del Norte aron maoy mahimong host sa amoang opening program for our 2022 DOLE XI Sports Activity. One of the reasons of course, nganong naa ta diri is because we have established a good partnership and collaboration with the province of Davao del Norte in implementing many of the DOLE programs,” sumala ni Atty. Balais.
Si Miss Doria, empleyado sa DOLE Davao del Norte malipayon ug nahinangop sa pakighimamat sa uban nga mga katrabaho.
"We are grateful kay karon pa ni nahitabo for how many years and excited mi tanan. And, of course, naa poy siyempre kulba kay first time magharap me from different field offices. So, we will see kung kinsa gyud ang mga players sa amoang team. But ang amoang goal is to have fun and get to know each gyud the entire DOLE Family," sulti ni Miss Doria.
Sa pikas bahin, dungan sa maong kalihokan, gidawat sa Probinsya sa Davao del Norte pinaagi ni Provincial Sports & Youth Development Officer Giovani Gulanes, ang representante ni Kuya Gov ang Certificate of Entitlement gikan sa DOE. Ang maong sertipiko nagtumbok sa P6 milyones nga pondo alang sa katumanan sa Tulong Panghanapbuhay sa Displaced/Disadvantage Workers (TUPAD) program sa probinsya diin ang mga benepisyaryo niini, sumala pa, naka-profile na sa DOLE-XI.
Writer: Lorna Tripoli
