Gipangunahan ni Vice President Sara Z. Duterte ang nasud Pilipinas sa paghatag pasidungog sa mga magtutudlo tungod sa ilang kadasig, katakus ug gahum sa pag-umol sa kaugmaon sa mga kabataan.

“Saludo po ako (sa inyo) mga Maam at Sir… Bilib ako sa tibay ng puso ninyo. Sinasalamin ninyo ang tibay at puso ng ating bansang Pilipinas,” sulti ni Duterte, atol sa pag-abli sa 2022 National Teachers Month (NTM) Celebration sa DavNor Gym ganinang buntag.

Ang probinsya sa Davao del Norte ang napili sa Department of Education (DepEd) nga mahimong ‘host’ sa paglusad sa NTM karong tuiga, nga ipahigayon gikan Septyembre 5 hangtud Oktobre 5, 2022.

Sa iyang online message, gidayeg sa bise presidente ang kadasig, kaisug, dedikasyon ug propesyonalismo sa mga titser sa pagtudlo sa kabataan, bisan pa taliwala sa mga daghang hagit ug kalamidad, sama sa pandemya nga nasinati sa tibuok kalibutan.

Siya nagpasalamat sa pakig-alayon sa mga magtutudlo sa mga LGU officials, private sector, ug development partners aron makaprinta sa mga module ug paghatag dugang ‘learning resources’ sa mga kabataan.

Gipasalig ni Duterte, kinsa mao sab naglingkod isip secretary sa DepEd nga iyang tutukan ang kaayohan ug paglambo sa mga titser.

Gitahasan ni Pangulong Ferdinand "Bongbong" Marcos Jr. si Duterte isip officer-in-charge sa nasud, atol sa pagbisita niini sa Indonesia ug Singapore karong semanaha.

Sulti sab ni Governor Edwin “Kuya Gov” I. Jubahib nga isip pag-ila sa mga sakripisyo ug kakugi sa mga magtutudlo, gipalig-on sa probinsyal nga panggamhanan ang suporta niini sa sektor sa edukasyon, dili lang panahon sa Brigada Eskwela, aron masiguro ang luwas ug nindot nga mga tulonghaan sa lalawigan.

Dugang niya nga gipaambit sa probinsya ang pasilidad niini sa PTV-DavNor Channel 48 ug DXNR-FM Radio 911 alang sa TV and Radio-Based Instruction program sa DepEd, labi na panahon sa lockdown.

Sulti ni Kuya Gov nga siya mismo usa ka buhing testimonya sa dakong tabang ug impluwensiya sa iyang mga titser aron molampos gikan sa kapobrehon.

“I instilled the values and virtues they have taught me to become successful in life. They were useful in expanding my business and in selflessly serving the best interest of my people (Akong gisilsil ang mga hiyas ug mithi nga ilang gitudlo ngari kanako aron ako molampos. Gigamit nako kini aron pagpalapad sa akong negosyo ug sa tinuoray nga pagsilbi sa katawhan),” sulti sa gobernador.

Mihatag sab sa ilang pagsaludo sa mga titser sila 1st District Congressman Pantaleon Alvarez, Metrobank Foundation President Aniceto Sobrepena, Education Undersecretary Atty. Gerard Chan, ug DepEd-XI Regional Director Dr. Allan Farnazo.

 

 

 

 

 

DavNor News