Nasakmit sa Davao del Norte ang 2022 Davao Region SDG Champion Award tungud sa DavNor KAAGAPAY program ni Governor Edwin “Kuya Gov” Jubahib.

Daog ang probinsiya isip Best in Local Government Unit (LGU) Category, sanglit napili nga pinakamaayong programa sa tibuok Rehiyon 11 ang programang DavNor KAAGAPAY (Kawsa sa Agrikultura ug Panginabuhian sa Barangay (KAAGAPAY) sa pagtuman sa Sustainable Development Goals (SDG).

Ang award maoy usa sa kinadayagang kabahin sa unang 2022 Davao Region SDG Fiesta, isip pag-ila sa mga LGUs ug mga ahensiya nga mipakita sa ilang sulundon nga pagpatuman ug labing maayo nga mga buhat sa pagkab-ot sa mga SDG.

Ang SDG maoy kasingkasing sa 2030 Agenda nga gisagop sa mga miyembrong nasud sa United Nations (UN), apil ang Pilipinas, isip unibersal nga panawagan sa tumong nga taposon ang kapobrehon, panalipdan ang atong planeta ug sigurohon ang kalinaw ug kalamboan para sa tanan sa tuig 2030.

Sa 17 ka mga katuyuan sa SDGs, unom niini ang natumbok sa KAAGAPAY Program, diin lakip niini ang pagwagtang sa kakabus (SDG1), walay kagutom (SDG2), pagparehas sa gender (SDG5), desente nga trabaho ug malamboong ekonomiya (SDG8), kinabuhi sa yuta (SDG 15), ug kalinaw, hustisya, ug lig-on nga mga institusyon (SDG16).

Gilusad ni Kuya Gov ang DavNor KAAGAPAY Program sa tuig 2020 isip ‘complete package’ aron pugngan ang krisis sa pagkaon ug mohatag panginabuhian sa mga Dabaonon panahon sa pandemya.

Hangtud Hulyo 2022, duna nay kapin 10,000 ka pamilyang Dabaonon ang nakabenipisyo sa programa. Dul-an sa 100 hektarya ang natamnan sa backyard ug communal vegetable farming nga dunay labaw sa 110 metric tons nga produksiyon sa gulay ug kapin P10 million nga income sa mga mag-uuma.

Labaw sa 50,000 ka mga manok ang gitagtag sa 275 ka People’s Organizations (POs). Dunay 10,676 ka pamilyang benepisaryo ang nakadawat og livelihood assistance nga mobalor P45 million, sa tabang sa Department of Labor and Employment (DOLE). Mokabat sab ngadto sa 64,334 ka assorted seedlings sa kahoy ang gitanum sa mga daplin sa suba ug mga highway.

Gipildi sa Davao del Norte and pito ka mga entries gikan sa nagkalainlaing mga probinsya ug dakbayan sa rehiyon sa 2022 Davao Region SDG Fiesta Champion Award, nga gipahigayon sa Regional Development Council (RDC)-XI, kauban ang National Economic Development Authority (NEDA)-XI. (Uban sa taho ni Jay Banjal)

Writer: Noel P. Baguio

 

 

 

DavNor News

nainggo