Gipakita sa mga opisyales ug katawhan sa Davao del Norte ang ilang pagmahal kang Pangulong Ferdinand "Bongbong" Marcos, Jr. pinaagi sa pagpartisipar sa Nationwide Bamboo-Tree Planting Activity sa Barangay Bobongon, Santo Tomas, Davao del Norte.

Gipangunahan ni Gobernador Edwin "Kuya Gov" I. Jubahib ang gatosan ka mga indibidwal gikan sa nagkalain-laing ahensiya ug sektor sa pagpananom ug dul-an 500 ka mga seedling sa kawayan, agi’g pagtimbaya sa ika-65 nga adlaw'ng natawhan sa presidente.

"Mao ni ang atong regalo sa birthday sa atong presidente... Atong gipakita ang atong tinud-anay nga suporta sa atong mahal nga President Ferdinand "Bongbong" Marcos, Jr., labi na jud sa iyang programa sa food sufficiency and security program ug programa sa pagmahal sa kinaiyahan,” ingon ni Kuya Gov.

Uban sa tema nga "Buhayin Natin ang Pangangalaga sa Kalikasan", ang maong okasyon dungan sab sa kasaulogan sa Philippine Bamboo Month ug 122nd Philippine Civil Service Anniversary.

Saysay ni Kuya Gov nga kawayan ang gitanom sanglit gawas sa kalig-on niini ug nailhan nga maluntarong alternatibo sa kahoy, dako sab kini’g tabang sa ‘economic activity’ ug panginabuhian sa katawhan.

“Sa kawayan kausa lang ta motanom. Human maputol, motubo na pud kini’g balik. Dili parehas sa kahoy nga pagkahuman og putol balik na pud kita’g tanom ug mohulat na pud ta’g another 30 years,” sulti sa gobernador.

Butyag niya nga gisugdan na sa probinsiya ang pasilidad alang sa engineered bamboo production, pinaagi sa suporta sa programang Shared Service Facility (SSF) sa Department of Trade and Industry (DTI).

Timailhan sa iyang bug-os nga suporta sa industriya sa kawayan, midonar si Kuya Gov og P1 million gikan mismo sa iyang kaugalingong bulsa, aron matabangan og tukod ang Engineered Bamboo Processing Facility sa Tagum National Trade School.

Si DTI-Davao del Norte Provincial Director Romeo Castañaga mipasalig sa dakong prospek sa industriya sa kawayan, labi na tungod sa daghang gamit niini sa industriya isip construction materials, sama sa tiles, muebles, ug uban pa, ug sa panapton, sabon, bike, activated charcoal ug daghan pang uban.

"Dili lang alang pangkoral, pang-amakan ug dabong ang kawayan. Usa na kini ka dakong industriya karon,” gipahingusgan ni Castañaga.

Butyag ni Kuya Gov nga ang reforestation activities kabahin sab sa iyang programa nga DavNor KAAGAPAY Program (KAwsa sa AGrikulturA ug PAnginabuhian sa barangaY).

Kauban si Provincial Environment and Natural Resources Officer (PENRO)-National Amelda Vera Cruz, gipasalamatan ni Department of Interior and Local Government (DILG) Provincial Director Jonathan Leybag ang mga opisyales ug sektor nga misalmot aron magmalampuson ang okasyon.

Apil sab sa mga opisyales nga mitambong sila Board Member Nicandro Suaybaguio, Jr., B.E. Dujali Mayor Atty. Leah Marie “TATA” Moral-Romano, Santo Tomas Mayor Roland Dejesica.

Miduyog sab sa maong bayanihan activity ang tanang mga departamennto sa Kapitolyo, mga local government units (LGUs), DA, DOLE, DepEd, DSWD, AFP, PNP, BFP, CSOs, Freyssinet ug uban pa.

Writer | Noel P. Baguio

 

 

 

DavNor News