Mokabat P6 milyones ang nasungkit nga pondo ni Governor Edwin “Kuya Gov” Jubahib, gikan sa Department of Social Welfare and Development (DSWD), ang gilayong gipang-apod-apod sa 600 ka mga benepisyaryo sa Livelihood Assistance Grant (LAG), sa Davnor Gym, Mankilam, Tagum City, niadtong Septyembre 8, 2022.

Mismong si Kuya Gov ang mitunol sa maong ayuda kauban ang mga personahe sa DSWD Region XI nga gipangunahan ni Julius Duterte, ang Government Private Sector Partnership Officer, sa pagkigtambayong ni Provincial Social Welfare and Development Officer Rosalinda Rapista.

Sa mensahe ni Kuya Gov, iyang gipasalamatan si DSWD Secretary Erwin Tulfo gumikan sa paghatag sa nasangpit nga ayuda. Giawhag niya ang mga benepisyaryo nga gamiton sa sakto ang ayudang nadawat, sanglit dugang kining puhunan sa ilang tagsa-tagsa ka negosyo. Matud pa niya nga kinahanglang i-rolling una ang ilang kwarta aron modako kini ug moginansya.

“Isip inyong Kuya Gov sa probinsya nabati nako ning tanan, mao ni purpose nako nga nag Governor ko para motabang sa katawhan. Mao nang naningkamot ta nga makakab-ot og kwarta para makatabang sa inyoha. Ug karon, gitubag ta sa DSWD. So, malipayon mong 600 nga maoy benepisyaryo karon tungod kay aduna moy magamit. Ang akong hangyo sa inyoha kaning kwartaha ayaw ninyo’g gastoha ni’g one time. Kaning kwartaha pwede mo diri mo-start mamaligya’g kakanin, magluto og mga pamainit, sud-an o mamalit mo’g gulay sa mga nagtanom unya inyo pong ibaligya sa palengke,” sulti sa gobernadora.

Dugang sa Gobernador nga iyang himuon ang tanan aron mahatagan og maayong panginabuhian ang iyang mga ginsakopan. Hinungdan nga nakigsabot kini sa mga negosyante sa probinsya nga posibleng makahatag og trabaho sa mga Dabaonon.

Sumala ni Julius Duterte, kini ang katapusang higayon nga mohatag og livelihood assistance grant ang DSWD gumikan kay mawad-an na’g gahum ang state of calamity tungod sa pandemyang covid-19 sa Septyembre 12, ning tuiga.

Iya sab gibutyag nga sa kinatibuk-an mokabat sa 2,130 ka mga benepisyaryo sa Davao del Norte ang makadawat sa tag-P10 mil nga ayuda sulod sa usa ka semana sa ilang pagpanghatag. Naggikan kini sa lungsod sa Asuncion, Carmen, Talaingod, Sto. Tomas ug sa siyudad sa Tagum ug sa Islang siyudad sa Samal.

“Ang madawat sa matag benepisyaryo nagkantidad og P10,000. kini gamiton nila sa ilang tagsa-tagsa ka livelihood program isip dugang capital. Kini usa ka pamaagi sa gobyerno aron mahaw-as sa kalisud, after the pandemic nga atong na-experience,” asoy sa opisyal.

Malipayong gidawat sa mga benepisyaryo ang naasoyng ayuda labi na ni Antonia Laurente, hingkod ang pangidaron ug mulopyo sa Brgy. Madaum, Tagum City, nga duna na siyay dugang puhunan sa iyang gamayng negosyo. Saysay ni Laurente, nga wala nay trabaho ang iyang bana ug duna pa siya’y duha ka apo nga gibuhi. Maong dako kaayo ang iyang pasalamat kang Kuya Gov gumikan sa maong livelihood assistance.

“Nagpasalamat gyud kog dako ni Kuya Gov nga nakadawat ko’g P10,000.00 para idag-dag nako’g kapital para sa akong tinda-tinda nga ginagmay… Dako gyud ikatabang kay pait gyud mi kaayo sa amoa. Nalipay gyud ko’g dako nga nakadawat ko ani,” matud ni Laurente.

Sagad sa mga benepisyaryo mga mamumuo sa pribadong sektor nga nawad-an og trabaho tungod sa pandemya, ug ang uban sab kanhing mga empleyado sa LGU Tagum nga karon nagsugod og ginagmay’ng negosyo.

Writer: Nestor Mata, Jr.

 

 

 

DavNor News

nainggo