Gipangunahan ni Governor Edwin “Kuya Gov” Jubahib ang gipahigayong 3rd Quarter PDRRMC Davao del Norte Council Meeting sa Bulwagan ng Karunungan, Mankilam, Tagum City, niadtong Septyembre 3, 2022.

Gitambongan kini sa pipila ka mga labaw sa departamento sa kapitolyo, mga Non-Government Organizations (NGO), Civil Society Organization (CSO) ug han-ay sa media.

Tuyo sa maong panagtapok ang paghisgot sa katakos ug kaandam sa mga ahensiya sa probinsyal nga panggamhanan sa pagtubag sa mga nagkadaiyang hagit hatud sa kalamidad, trahedya ug emerhensiya.

Gibatbat sa maong tigum ang mga aksyon sa mga departamento sa nagkadaiyang panghitabo, sama na lang sa paspas nga pagresponde sa buhatan sa Provincial Social Welfare and Development sa nahitabong landslide sa Upper Mesolong, Sto. Niño, Talaingod.

Nag-apud-apod gilayon kini’g mga food packs, sleeping kits ug cash assistance sa mga biktima. Katambayayong ang Provincial Engineering Office sa dinalian nga clearing operation sa mga kalsada panahon nga dunay landslide. Gipaambit sab niini ang daghan nilang mga proyekto agi’g pagtubag sa mga nakalabayng kalamidad sama sa baha.

Sumala ni Kuya Gov nga kinahanglan ang pagplastar sa mga programa aron mapugngan ug mapagaan ang mamahimong epekto sa umalabot nga kalamidad ug trahedya. Usa ka panig-ingnan niini ang sagunsong natalang sunog, di pa lamang dugay, sa siyudad sa Tagum nga mikutlo sa pipila ka mga kinabuhi.

Gisaysay sa gobernador ang kamahinungdanon sa pagbakuna sa tanang katawhan sa DavNor labi na sa mga senior citizen aron hingpit nang tuldokan ang problema sa Covid-19 ug molagsik na pagbalik ang dagan sa ekonomikanhong kalihokan sa probinsya. Nunot niini, mohatag si Kuya Gov og insintibo sa mga senior citizen nga magpabakuna, sa kantidad nga P2 mil matag isa.

“Gihimo na nato na o ato nang gi-implement nga magahatag ta og P2,000.00 as incentives sa tanang magpabakuna karon, tungod nakita nato nga anaa pa ang presence sa covid-19 nga virus nga atong gikahadlokan. Although, mahimo ni siya nga minimal kung ang isa ka tawo is vaccinated. But kung dili siya vaccinated possible nga mahimong severe especially na kung aduna siyay comorbidity… So, awhag nako sa tanan, nga ang atong gobyerno, nga ang atong provincial government karon naghatag na gyud ta’g incentives para lang gyud nga kini makapaawhag sa inyo nga magpa-vaccine ta tungod kay pinakaimportante sa atoa ang covid vaccine para mahuman na ta sa atong problema sa covid-19,” sulti ni Kuya Gov.

Laraw sab karon sa probinsyal nga panggamhanan ang pagpasa og usa ka ordinansa nga mag-intitutionalize sa Bio Security aron mapanalipdan ang mga tawo o mananap batok sa sakit o makadaut nga biological agent sama sa pagsulod sa African Swine Fever kon ASF ug uban pang mga sakit.

Writer: Nestor Mata, Jr.
Photo Credits: Kapehan sa DavNor

 

 

 

DavNor News