Pinaagi sa kolaborasyon sa Keys Music Studio ug Dudu Artist Management, nahatagan og dakong oportunidad ang 10-anyos nga Dabaonong child actress nga si Geanne Cañete kinsa mahimong lead actress sa pelikulang Leilaira nga nagahisgot mahitungod sa isyung drug and child trafficking ug ipasalida sa Tagum City Historical ug Cultural Center (TCHCC) karong umalabot nga Oktubre 22, 2022.

Kauban sab ni Geanne mibida kagahapon sa Robinson’s Mall Tagum ang mga casts sa Leilaira atol sa gipahigayong press conference diin gihatagan og higayon ang casts nga ipailaila ilang kaugalingon ug ang ilahang mga nagkadaiyang karakter sa pelikula.

Isip rising star sa Davao del Norte, dako’g kontribusyon ang pagkakuha ni Geanne sa maong role nga mas mailhan pa ang talento sa mga kabataang Dabaonon sa sining sama sa pagkanta, pagsayaw, pag-arte ug uban pa.

Gani ang administrasyon ni Governor Edwin “Kuya Gov” Jubahib naghatag dakong pagtagad sa paghulma, pagpauswag ug pag-endorso sa mga talento sa mga Dabaonong kabataan pinaagi sa pagpasundayag og mga recital sa mga performing artists sa PTV - Davnor 48 Channel (Free Tv), Lovenet Channel 26 ug One Davnor Network and PTV Davnor 48 (opisyal nga Facebook pages sa Probinsyal nga Panggamhanan sa Davao del Norte).

Ang tickets sa Leilaira mapalit sa Geanne’s Eatery, kanto Suaybaguio sa tag-P200 kada usa.

Writer: Danica Delight Villanueva
Photo: Michael Balila

DavNor News

nainggo