Malampusong napirmahan ang MOA kon Memorandum of Agreement atol sa gipahigayong oryentasyon kalabot sa Community and Service Oriented Policing kon CSOP system tali sa mga local executives, Philippine National Police ug National Police Commission niadtong Septyembre 15, 2022 sa New Marangal Hall, Davao del Norte Provincial Police Office.

Nagkahiusa sa usa ka tumong ang mga opisyal sama nila ni Ma. Teresa Tuburan Pacudan, Napolcom XI Regional Director, DavNor Provincial Director P/Col. Antonio D. Alberio Jr., Atty. Reina Rea Q. Zozobrado, ang Provincial Police Officer sa Davao Occidental, inubanan sa mga mayor sa mga LGUs sa probinsya alang sa mas epektibong pag-implementar sa kampanya batok kriminalidad sa mga kapulisan.

Nakalatid sa MOA ang pagtudlo sab og focal personnel aron sa paglihok ug pagsiguro sa kalampusan sa maong mga programa, pag-edukar ug paglambigit sa uban pang mga aktibidad sulod sa CSOP Framework, re-orientation sa CSOP system ug uban pa.

Gihisgutan sab ang gahum ug papel sa mga mayor sa natad sa kalinaw. Gipasabot ni P/Col. Alberio nga nitumaw ang MOA sa pagsigurong mapatuman ug kahataga’g ngipon ang mga planong mugnaon sa naasoy’ng mga ahensiya.

Samtang gipaniguro sa Provincial Director sa PNP nga ang kinatibuk-ang probinsya nagpabiling hapsay ug malinawon.

“Manageable ang atong peace and order inubanan sa pagpaningkamot sa atong mga kapulisan nga mamentinar ang kahapsay ug kalinaw sa atong probinsya ug mga suporta usab sa atong mga local government units from Provincial down to the City & Municipality. Ahh… mayo kayo ug usa na siya ka rason nganong na maintain nato ang kahapsay ug kalinaw sa atong tibuok Probinsya sa Davao del Norte”, pagsaysay ni PD Alberio..

Writer: Lorna Tripoli
Photo: Aljun Castilla, via Panabo CIO
 

 

 

 

DavNor News

nainggo