Gibida sa mga Children In Conflict with the Law (CICLs) ang ilang talento ug pagkamamugnaon atol sa selebrasyon sa ika-walong (8) kasumaran sa Bahay Pag-asa Davao del Norte ning bulana sa Purok Dos, Poblacion, New Corella, Davao del Norte.

Gawas sa makapahingangha nga mga dance performance ug alawiton, highlight sa kasaulogan ang Likha Art Exhibit diin gipakita sa mga residente ang ilang ‘artistic side’ pinaagi sa ilang gidibuho nga mga painting. 

25% sa kinitaan sa mabaligya nga painting igahin alang sa pagpalambo sa Bahay Pag-asa Center, samtang 75% sa abot ang maangkon sa bata nga mihimo sa artwork.

Gipasundayag sab ang mga livelihood products nga minugna sa mga residente sama sa tote bags, pitaka, alkansya, key chain, pottery, ug daghan pa. Alang sa maong livelihood products, 75% sa kinitaan ang maadto sa center, samtang 25% sa abot ang madawat sa mga bata.

Sumala ni Provincial Social Welfare and Development Officer (PSWDO) Rosalinda O. Rapista, dakong kabahin ang Bahay Pag-asa Center sa paghatag paglaom ug pagpabarog balik sa mga batang nahisalaag. 

Sa ingon, pinaagi sa mga kaubang ahensya, naabiyohan ang mga bata og nagkadaiyang skills training, recreational activities, ug gani, gitanyag sab ang alternative learning education aron masigurong makapadayon sila sa ilang pag-eskwela.

“We are very much thankful sa atong mga partners for really extending effort na ma-develop ang full potential sa atong mga bata, not only their skills, knowledge; but also giunsa nila pag-regain sa ilahang self-worth since naa sila diri for rehabilitation and recovery… With the effort of the different agencies, naga-invite ta og taga-TESDA… In fact, kanang stage karon na naa satong luyo, sila ang nagmontar niana… Sila na mismo ang naga-welding. Kamao na sila’g mga table skirting… sila na tanan nagabuhat,” sulti sa PSWDO Head. 

Dugang pa ni Rapista, mando gayud ni Gobernador Edwin “Kuya Gov” I. Jubahib ang pagsiguro nga mahatagan og patas nga serbisyo ug katungod ang tanang katawhan sa Davao del Norte, ilabi na kadtong mga gihikawan nga sektor sama sa mga CICL.

“Naa gyud ni sa Government’s thrust ni Kuya Gov—KUYA GOB NG MASA, where in fact naa sa Letter ‘U’—Universal Health Care and Social Services. Ug naa sad ni siya mo-fall sa Letter ‘N’—sa Nurturing [Society]... so naa gyud na s’yay marching order sa’moa to really give priority sa kani na mga bata na nahisalaag,” saysay ni Rapista.

Gani, tungod namintinar sa Bahay Pag-asa Davao del Norte ang maayong pagdumala niini ubos sa administrasyon ni Kuya Gov, gidawat sab sa organisasyon atol sa maong kalihokan ang renewed Certificate of Accreditation, samtang kini nagpabilin nga nag-inusarang Bahay Pag-asa sa tibuok nasud nga nakasakmit og Level 2 Accreditation.

Writer: Gwyn Kelly O. Lobitos

DavNor News