Nadawat sa 22 ka mga miyembro sa DavNor EntrePinoy Association (DEA) ang tag-P20,000 cash nga gitunol mismo ni Gobernador Edwin “Kuya Gov” Jubahib sa gipahigayong Releasing of Livelihood Assistance niadtong Septyembre 23, sa GSP Training Hall, Capitol Compound, Mankilam, Tagum City.

Naggikan sa Department of Labor & Employment (DOLE) ang maong ayuda nga gi-representahan ni Provincial Director Angelina Talingting kuyog ang iyang mga personahe. Ilalom sa DOLE Livelihood Program (DLP), tumong sa maong pinansiyal nga tabang ang paghatag og panginabuhian labi na ngadto sa naapektohan sa pandemya. Gilaoman sa naasoyng programa nga matabangan ang mga benepisyaryo nga makatindog-balik ang ilang ekonomikanhong kahimtang, isip mga gagmay’ng negosyante.

Pipila sa negosyong gisudlan sa mga miyembro mao ang Rice Retailing, Sari-Sari Store Operation, Egg Wholesaling, Frozen Goods Wholesaling, Takoyaki NegosyoKart, Siomao & Empanada Making, Kakanin NegosyoKart, Specialty Cake Making, Bibingka with Healthy Juice NegosyoKart, E-Loading Station ug Massage Therapy Business.

Nanghinaut si Kuya Gov sa matag miyembro nga ayohon paggamit ang ilang nadawat nga ayuda aron kini molambo ug makatabang sa ilang dugang panginabuhian.

“Kining mao nga badyet gi-allocate gyud para sa inyoha. Agi usab pasalamat sa inyohang tanang serbsiyo sa atoa diri sa probinsya, as a resource person. Dako kaayo’g gikatabang ang inyong tanang nga pagpaningkamot. Ug mao pud nang gitan-aw nato nga dapat pud mahatagan og premyo ang inyong pagpaningkamot,” matud sa gobernador.

Gisaysay sa kanhing presidente sa asosasyon sulod sa 12 ka tuig ug kasamtangang miyembo, si Maria Encarnacion, nga niadto pang 2020 gihikay ilang aplikasyon sa DOLE apan nadelatar kini tungod sa pandemya.

“Actually, ang mga members niini mura’g nawad-an na gali’g paglaum. They lost hope because of the pandemic. Mura ba’g wala na man siguro to kay mura’g wala gyud naglihok during pandemic. Pero, hopefully, sa sige namo’g followup sa office, niingon gyud sila nga naa gyud daw. Dili gyud daw mahitabo nga dili madayon. Dako gayud kini’g ikatabang sa tagsa-tagsa kanamo nga miyembro nga naghatag sa ilang serbisyo. Dako kaayo ilang pasalamat tungod kay niining pamaagiha makatabang ni sa ilahang pagsugod na pud sa ilang mga kanya-kanyang negosyo,” sa panubay ni Encarnacion.

Sulti ni PADO-EWDD/PESO Division Head Gloria Excelsa Pamugas nga sa gusto makabenepisyo sa susamang ayuda, kinahanglan nga magtukod og asosasyon ug iparehistro sa ilang buhatan. Mas dali kuno ang pag-apruba sa DOLE kung usa ka grupo ang magkahiusa sa pag-apply.

Gitiklop ang maong panagtigom pinaagi sa usa ka salo-salo sa mga pagkaong gihikay mismo sa matag miyembro alang sa maong okasyon.

Writer: PESO Davao del Norte / Jun Rey Villanueva
Photos: PESO Davao del Norte

 

 

 

DavNor News