Planong tukoron karon ang mga Halal Hub alang sa Muslim communities sa duha ka lungsod sa Davao del Norte. Kini ang pagpadayag nga suporta ni Gobernador Edwin “Kuya Gov” Jubahib atol sa courtesy call ni Sec. Guiling A. Mamondiong sa National Commission on Muslim Filipinos (NCMF) kuyog ang uban pang mga opisyal sama nila NCMF Regional Director Architect Sherilla Porza-Sawah ug BGen. Jesus Durante III sa Tahanan ng Gobernador niadtong Septyembre 29, 2022.

Ang mga delegado sa NCMF una nang nag-on site visit sa pagpanguna ni Provincial Administrator Engr. Josie Jean Rabanoz ngadto sa lungsod sa Carmen ug Panabo City diin imontar ang maong proyekto.

"Umiikot po kami sa buong Pilipinas at naghanap po kami ng areas, so we can put up Halal Agro Industrial Hubs in support of the program of President Marcos for National Food Sufficiency..," pagsubay ni Sec. Mamondiong.

Gipasalamatan ni Mamondiong si Kuya Gov sa paggahin niini og luna alang sa naasoyng proyekto diin gibana-banaang mosumada og usa ka gatos ka ektarya sa duha ka lungsod. 

Sa susamang okasyon, gipasundayag sab sa gobernador ngadto sa mga delegado ang KUYA GOB NG MASA developmental agenda nga maoy timon sa kalamboan sa probinsya labi na ang pagpalig-on sa sektor sa agrikultura ug panginabuhian.

Gipaniguro niya ang iyang suporta sa mga programa ug proyekto sa mga kaigsuonang Muslim sama na lang sa Madrasa ug mga relihiyosong kalihokan sa ilang komunidad, butang nga gikalipay sa secretary.

"Nakita po namin ‘yong economic zone na deklara sa probinsyang ito sa tingin ko po ay yan ang napili na natin as far as this Commission is concerned," matud ni Sec. Mamondiong.

Ang Halal Hub maoy mamahimong tinubdan sa mga 'healthy foods" sa mga Muslim communities isip kabahin sa suporta sa food sufficiency sa probinsya ug sa kinatibuk-an.

Writer: Lorna P. Tripoli
Photos: Franz Pepito III

 

 

 

DavNor News