Abli ug andam na moserbisyo sa publiko ang pinakabag-o nga pribadong health and wellness hospital sa Tagum, Davao del Norte - ang Tagum Medical City (TMC), nga nahimutang sa Purok 3-Rattan, Apokon, Siyudad sa Tagum.

Kini human sa gipahigayon nga Ribbon Cutting and Blessing Ceremony sa pasilidad ug Dedication sa Hospital Chapel sa St. Padre Pio niadtong Lunes, Oktubre 3, 2022, sa TMC Medical Atrium.

Sa pagka karon, wala pa gadawat og admissions ang ospital apan abli na kini aron sa pagtanyag og Radiology and Imaging Services sama sa Digital X-ray, Ultrasound, CT-Scan, ug ECG. Ang ilang Renal Care Center nagadawat na sab og enrollees alang sa buot magpa-dialysis treatment.

Sumala ni President/CEO Dr. Manuelito G. Capoy,  ang Tagum Medical City nga kanhing Bishop Joseph Regan Memorial Hospital (BJRMH), gidumalaan gihapon sa susamang grupo sa mga doktor, apan hingpit na kining gipanag-iyahan karon sa Korporasyon. Sa ingon, mas dali na lang ang pagpatuman og developmental projects ug innovations.

Dugang pa ni Dr. Capoy, ang TMC nagpasigarbo og bag-o ug modernong mga hospital equipment, state-of the art facilities, ug newly-hired nga mga espesyalistang doktor, uban ang 140-250 nga bed capacity. 

Apan gipasalig sa Korporasyon nga bisan pa man sa pag-upgrade sa pasilidad ug pagbaton og brand new nga mga ekipo sa ospital, masiguro sa mga konsumidor nga walay pagtaas sa rate o presyo sa ilang mga serbisyo.

Mipaabot sab sa iyang suporta sa pag-abli sa Tagum Medical City si Gobernador Edwin “Kuya Gov” I. Jubahib, kinsa kanunay’ng nagsiguro nga matubag ang medikal nga panginahanglanon sa tanang katawhan sa Davao del Norte, ilabi na kadtong mga kabus.

Gani, kahinumdoman nga tungod sa paningkamot ni Kuya Gov, napatuman ang Zero-Billing Program ug padayon nga pagtukod sa lima ka district hospital sa Probinsya.

Writer: Kelly Lobitos
Photos: Ella Mana-ay/Precious Gem

 

 

 

DavNor News